Hormatly saglygy goraýyş we derman senagaty ulgamynyň işgärleri!
Sizi Saglygy goraýyş we derman senagaty işgärleriniň güni mynasybetli tüýs ýürekden gutlaýaryn. Arkadag Serdarly bagtyýar ýaşlar ýylynda bu ajaýyp hünär baýramynyň şanyna geçiriljek dabaralaryň Garaşsyz, hemişelik Bitarap döwletimizde gazanylýan beýik üstünliklere buýsanjymyzy has-da pugtalandyrjakdygyna berk ynanýaryn.
Halkymyzyň saglygy, abadan we bagtyýar durmuşy biziň alyp barýan döwlet syýasatymyzyň ileri tutulýan ugurlarynyň biridir. Şoňa görä-de, Berkarar döwletiň täze eýýamynyň Galkynyşy döwründe milli saglygy goraýyş ulgamyny ösüşleriň täze belentliklerine çykarmak ugrunda ägirt uly işleri amala aşyrýarys. «Saglyk» Döwlet maksatnamasy esasynda milli saglygy goraýyş we derman senagaty pudagynyň düzümini öňdebaryjy dünýä tejribelerine laýyklykda kämilleşdirmek, ilatyň saglygyny berkitmek, ynsan ömrüniň dowamlylygyny uzaltmak, bedenterbiýäni we sporty ösdürmek, sagdyn durmuş ýörelgelerini ornaşdyrmak üçin zerur şertleri döredýäris.
Alnyp barylýan giň gerimli işleriň çäklerinde keselleriň öňüni almak, anyklamak we bejermek babatda öňdebaryjy tejribeleri milli saglygy goraýyş ulgamynda giňden ulanyp, lukmançylyk hyzmatlarynyň netijeliligini, elýeterligini we hilini yzygiderli ýokarlandyrýarys. Kabul edilen milli we döwlet maksatnamalary, hususan-da, «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasy», «Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasy», 2028-nji ýyla çenli döwür üçin Oba milli maksatnamasy esasynda paýtagtymyzda we welaýatlarymyzda Bütindünýä Saglygy Goraýyş Guramasynyň ölçeglerine laýyk gelýän saglygy goraýyş-anyklaýyş merkezlerini, şypahana edaralaryny, ýerli çig maldan derman serişdelerini öndürýän döwrebap kärhanalary, häzirki zaman ylmy-kliniki merkezlerini, saglyk öýlerini gurup, Garaşsyz Watanymyzyň taryhyna şöhratly sahypalary ýazýarys. Aziýanyň we Ýewropanyň dünýä meşhur öňdebaryjy lukmançylyk merkezleri bilen hyzmatdaşlykda lukmanlarymyzyň hünär derejesini ýokarlandyrmak boýunça hem giň gerimli işleri durmuşa geçirýäris. Gazanylýan bu uly üstünlikler we ösüşler türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň «Saglyk» Döwlet maksatnamasynyň hem-de nusgalyk işleriniň, biziň alyp barýan döwlet syýasatymyzyň ajaýyp miweleridir.
Hormatly saglygy goraýyş ulgamynyň işgärleri!
Biz Garaşsyz Watanymyza beýik söýgimiz, synmaz agzybirligimiz we jebisligimiz bilen bu ugurda giň möçberli wezipeleri durmuşa geçirmek arkaly gazanylan üstünlikleri berkidýäris. «Watan diňe halky bilen Watandyr! Döwlet diňe halky bilen döwletdir!» diýen şygarymyz esasynda milli saglygy goraýyş ulgamyny has-da kämilleşdirmek üçin öňümizde täze, belent maksatlary goýýarys. Arkadag Serdarly bagtyýar ýaşlar ýylynda biz ýokary amatlyklary bolan ýaşaýyş jaýlaryny, dolandyryş binalaryny, bilim we medeniýet edaralaryny, söwda-dynç alyş merkezlerini, seýilgähleri, öňdebaryjy lukmançylyk enjamlary bilen üpjün edilen saglygy goraýyş desgalaryny öz içine alýan döwlet ähmiýetli Arkadag şäheriniň birinji tapgyryny açyp ulanmaga berdik. Arkadag şäherinde ýerleşýän Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy geljegimiz bolan ýaş nesilleriň saglygyny goramak we dikeltmek bilen bagly örän möhüm işleri alyp barýar.
Aşgabat we Arkadag şäherlerindäki, ýurdumyzyň beýleki sebitlerindäki saglygy goraýyş edaralarynda çylşyrymly hem-de inçe ugurly lukmançylyk amallaryny geçirmek, çagalar öýlerinde, ýöriteleşdirilen mekdeplerde, mekdep-internatlarda terbiýelenýän we bilim alýan, howandarlyga mätäç çagalaryň saglygyny dikeltmek boýunça gazanylýan üstünlikler örän guwandyrýar. Biz geljekde-de bu ugurda maksatnamalaýyn özgertmeleri amala aşyrmak, Merkezi Aziýa sebitinde deňi-taýy bolmadyk, dünýäniň meşhur önüm öndürijileriniň ýokary tehnologiýaly enjamlary bilen üpjün edilen bejeriş-anyklaýyş we ylmy-kliniki merkezlerini, köpugurly hassahanalary, şypahanalary, derman kärhanalaryny, saglyk öýlerini gurmak arkaly Garaşsyz, hemişelik Bitarap döwletimiziň saglygy goraýyş we derman senagaty ulgamynyň täze ösüşlerini üpjün ederis. Halkymyzyň saglygyny goramak, ýurdumyzyň abadançylygyny gazanmak biziň iň uly maksadymyzdyr.
Hormatly saglygy goraýyş ulgamynyň işgärleri!
Biz dünýä döwletleri, iri halkara guramalar bilen saglygy goraýyş boýunça hyzmatdaşlygymyzy barha berkidýäris. Telelukmançylyk we telemaslahatlar arkaly özara tejribe alyşmak, amaly lukmançylyga öňdebaryjy usullary ornaşdyrmak ýaly möhüm ugurlarda ylmy-lukmançylyk hyzmatdaşlygyny giňeltmäge uly ähmiýet berýäris. Lukmançylyk hem-de ylmy diplomatiýa babatda hyzmatdaşlygyň täze ugurlaryny öňe sürmek bilen, Birleşen Milletler Guramasy, onuň ýöriteleşdirilen düzümleri, aýratyn-da, Bütindünýä Saglygy Goraýyş Guramasy, dünýäniň öňdebaryjy saglygy goraýyş edaralary we ylmy-barlag merkezleri bilen gatnaşyklarymyzy has-da işjeňleşdirýäris. Şoňa görä-de, ýurdumyzyň saglygy goraýyş ulgamyny döwrebaplaşdyrmak babatdaky oňyn tejribesi, keselleriň öňüni almakda, olary ýok etmekde ýetilen sepgitler, ilaty ýokary hilli bejeriş-öňüni alyş hyzmatlary, derman serişdeleri we öňüni alyş sanjymlary bilen elýeterli üpjün etmekde gazanylan üstünlikler Birleşen Milletler Guramasy hem-de onuň ýöriteleşdirilen düzümleri tarapyndan ykrar edilýär. Ilaty ýokary hilli bejeriş-öňüni alyş hyzmatlary bilen üpjün etmekde gazanylan üstünlikler üçin BSGG-niň Ýewropa sebit edarasy tarapyndan ýurdumyza ýörite nyşanyň gowşurylmagy munuň aýdyň subutnamasydyr.
Hormatly saglygy goraýyş we derman senagaty ulgamynyň işgärleri!
Sizi hünär baýramyňyz bilen ýene-de bir gezek tüýs ýürekden gutlaýaryn. Size berk jan saglyk, uzak ömür, maşgala abadançylygyny, ynsan saglygyny goramak ýaly asylly işleriňizde geljekde-de uly üstünlikleri arzuw edýärin.
Türkmenistanyň Prezidenti
Serdar Berdimuhamedow.
