Bişkekde şu ýylyň 12-nji oktýabrynda «Merkezi Aziýa: hyzmatdaşlygyň aýratynlyklary» Altynjy Merkezi Aziýa forumy işe başlady.

Öňdebaryjy analitikleri we hünärmenleri bir ýere jemlän bu forumy BMG-niň Merkezi Aziýa üçin öňüni alyş diplomatiýasy boýunça sebit merkezi bilen  Gyrgyz Respublikasynyň Prezidentiniň ýanyndaky Strategiki gözlegler boýunça Milli instituty gurady. Maslahata Merkezi Aziýa sebitinden bolan 60-dan gowrak hünärmen çagyryldy.

Myhmanlaryň arasynda sebitiň strategiki barlag institutlarynyň ýolbaşçylary we ekspertleri, ýurtlaryň ministrliklerinden we edaralaryndan bolan hökümet wekilleri, diplomatik we halkara guramalaryň, ilçihanalaryň ýolbaşçylary, köpçülikleýin habar beriş serişdeleriniň wekilleri bar.

Umumy plenar mejlisi we temalaýyn maslahatlar Bişkegiň häzirki zaman Hyatt Regency Bishkek myhmanhanasynda geçirilýär.

Maslahatlarda strategik barlaglar institutlarynyň, şeýle hem garaşsyz ekspert guramalarynyň ýolbaşçylarynyň we hünärmenleriniň çykyşlary hem-de tanyşdyrylyşlary bolar.

Her maslahat çekişmeler we  gatnaşyjylaryň sowallaryna jogap bermek bilen tamamlanar.

«Merkezi Aziýa ýurtlarynyň arasynda hyzmatdaşlygyň berkemeginiň, ynanyşmagyň we durnukly ösüşiň ýolunda» atly birinji sessiýada ýurdumyza Türkmenistanyň DIM-niň Halkara gatnaşyklary institutynyň Strategik barlaglar boýunça ylmy merkeziniň direktory Şiri Şiriýew wekilçilik eder.

Maslahatyň dowamynda hünärmenler sebitiň ýurtlarynyň arasynda netijeli hyzmatdaşlyk gurmak barada meseleler boýunça pikir alyşarlar. Şeýle hem forumda Türkmenistanyň DIM-niň ylmy işgäri Döwletmyrat Mämmedow sebitleýin hyzmatdaşlyk babatda çykyş eder.

Bişkege gitmezden ozal, Türkmenistanyň DIM-niň Halkara gatnaşyklary institutynyň Strategik barlaglar boýunça ylmy merkeziniň direktory Şiri Şiriýew bu merkeziň işgärleri tarapyndan şeýle forumlarda gysga möhletde ep-esli tejribäniň toplanandygy barada aýtdy.

Şeýlelikde, geçen ýylda Türkmenistanyň Daşary işler ministrliginiň Halkara gatnaşyklary institutynyň sebitiň öňki Bäşinji ekspertleriniň forumyny kabul edip, ony üstünlik bilen geçirendigini hem bellemelidiris.