Türkmenistanyň Döwlet migrasiýa gullugynyň başlygy A.Sazakowyň ýolbaşçylygyndaky wekiliýet 2023-nji ýylyň 9-13-nji oktýabry aralygynda Ženewada geçirilýän Birleşen Milletler Guramasynyň bosgunlaryň işi baradaky Ýokary komissarynyň müdirliginiň Ýerine ýetiriji komitetiniň 74-nji mejlisiniň işine gatnaşýar.

Mejlisiň dowamynda delegasiýalaryň umumy çykyşlary, Hemişelik komitetiň hasabatlaryna garamak, 2024-nji ýylyň meýilnamasynyň býujetini ara alyp maslahatlaşmak we kabul etmek, hemişelik komitetiň iş meýilnamasy, ýetmiş bäşinji mejlisiň wagtlaýyn meýilnamasyna garamak, wezipelere saýlamak we şuňa meňzeşler bolar.

Mejlisiň açylyşynda BMG-niň bosgunlaryň işi baradaky Ýokary komissary Filippo Grandi çykyş etdi we häzirki ýagdaýy suratlandyrdy hem-de Birleşen Milletler Guramasynyň Bosgunlaryň işi baradaky Ýokary komissarynyň müdirliginiň Ýerine ýetiriji komitetiniň öňünde durýan wezipeleri beýan etdi.

Türkmen delegasiýasynyň umumy eden çykyşynda bosgunlar, olary goramak we zerur şertler bilen baglanyşykly meseleleri çözmek üçin BMG-niň guramalarynyň, hususan-da Birleşen Milletler Guramasynyň Bosgunlaryň işi baradaky Ýokary komissarynyň müdirliginiň Ýerine ýetiriji komitetiniň arasynda ýakyn gatnaşyklaryň möhümdigi bellenildi.