2023-nji ýylyň 7-nji noýabrynda Türkmenistanyň Daşary işler ministri Raşid Meredow Ýaponiýanyň Türkmenistandaky täze bellenen Ilçisi Sasaki Hirosi bilen duşuşdy we onuň ynanç hatlarynyň nusgalaryny kabul etdi. Bu barada ýurdumyzyň daşary syýasat edarasy habar berýär.

Ministr Ilçini jogapkär wezipä bellenmegi bilen gutlady we türkmen-ýapon gatnaşyklaryny has-da berkitmek üçin diplomatik işini ýerine ýetirmekde türkmen tarapynyň doly goldaw we ýardam bermäge taýýardygyny nygtady.

Duşuşykda diplomatlar wajyp ikitaraplaýyn gün tertibini ara alyp maslahatlaşdylar, hyzmatdaşlygyň häzirki ýagdaýy we ileri tutulýan ugurlarda mundan beýläk-de ösdürmegiň geljegi barada pikir alyşdylar. Halkara we sebit guramalarynyň, şol sanda “Merkezi Aziýa + Ýaponiýa” formatyndaky dialogyň çäklerinde netijeli özara gatnaşyklary barada bellenildi.

Ministr Türkmenistan bilen Ýaponiýanyň arasynda syýasy, söwda-ykdysady, medeni-ynsanperwer ugurlarda hyzmatdaşlygyň ösüşiniň ýokary depginini belläp geçdi. Şol bir wagtyň özünde, netijeli gatnaşyklaryň esasyny iň ýokary we ýokary derejelerdäki yzygiderli syýasy gepleşikleriň düzýändigi nygtaldy.

Döwletara hyzmatdaşlygy giňeltmekde parlament diplomatiýasynyň möhüm ähmiýeti beýan edildi. Şu nukdaýnazardan, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň geçen ýylyň sentýabr aýynda Ýaponiýa amala aşyran saparynyň netijeleri barada aýdyldy.

Taraplar söwda we ykdysady gatnaşyklaryň netijeli ösüşine ünsi jemlediler. Energetika, ulag we aragatnaşyk, senagat, oba hojalygy, ekologiýa meseleleri, şeýle hem medeniýet, ylym, bilim pudagynda, şol sanda, Türkmenistanda ýapon dilini öwrenmekde hyzmatdaşlygyň ileri tutulýan ugurlary hökmünde kesgitlenildi.