Ýewropa Bileleşigi tarapyndan maliýeleşdirilýän Merkezi Aziýada serheti dolandyrmak boýunça Maksatnamanyň guramagynda geçirilen okuw maslahaty türkmen hünärmenleri üçin elektron okuw usulyýetini ornaşdyrmak we elektron okuw platformasyny ulanmak bilen baglanyşykly boldy.

Bu okuw maslahatyna Türkmenistanyň Döwlet gümrük gullugynyň ýanyndaky Okuw merkeziniň işgärleri, Türkmenistanyň Serhet institutynyň, Oba hojalyk ministrliginiň Döwlet weterinariýa gullugynyň, Oba hojalygy ministrliginiň Ösümlik karantini boýunça Döwlet gullugynyň we S.A.Nyýazow adyndaky Türkmen oba hojalyk uniwersitetiniň wekilleri gatnaşdylar.

Bilermenler okuw maslahatyna gatnaşyjylary Ýewropa Bileleşigine agza ýurtlaryň elektron okuw ulgamlaryny ornaşdyrmakdaky iň oňat tejribeleri bilen tanyşdyrdylar we gümrük edaralarynyň we serhet bölümleriniň bilim edaralarynda elektron okuw modullaryny taýýarlamak boýunça teklipler berdiler. Türkmenistanyň gümrük gullugy okuw meýilnamalaryny yzygiderli kämilleşdirýär.

Şeýlelik bilen Okuw merkeziniň işgärleri köplenç bir wagtyň özünde ähli sebit gümrük edaralarynyň ýaş işgärleriniň gatnaşmagynda wirtual ýygnaklary, okuw maslahatlary we uzak aralykdan sapaklary geçirýärler.