Şu gün paýtagtymyzda utgaşykly görnüşde parahatçylygyň, howpsuzlygyň we durnukly ösüşiň bähbidine Bitaraplygyň dostlary toparynyň ýokary derejedäki mejlisi geçirildi. Duşuşyga Birleşen Milletler Guramasyna agza döwletleriň wekilleri, şeýle hem halkara, sebit guramalarynyň ýolbaşçylarydyr işgärleri gatnaşdylar.
Toparyň 2020-nji ýylda Türkmenistanyň başlangyjy boýunça döredilendigini bellemek gerek. Häzirki wagtda oňa 25 döwlet goşuldy. Bu topar halkara derejede, hususan-da, BMG-niň çäklerinde yzygiderli hyzmatdaşlyga ýardam bermäge, öz syýasatyny bitaraplyk ýörelgeleri esasynda guraýan döwletleriň parahatçylyk döredijilik mümkinçiliklerini iş ýüzünde peýdalanmaga, gapma-garşylyklaryň öňüni almaga, olaryň sebäplerini we netijelerini aradan aýyrmaga, ynsanperwerlik meselelerini çözmäge gönükdirilendir.
Şu gezekki mejlise gatnaşyjylar öz çykyşlarynda netijeli halkara hyzmatdaşlygy ilerletmekde we ählumumy parahatçylygy, howpsuzlygy pugtalandyrmagyň gurallaryny işjeň ulanmakda ýurdumyzyň eýeleýän ornuna ýokary baha berdiler. Olar häzirki döwrüň ýagdaýlaryny, dünýä ösüşiniň meýillerini göz öňünde tutmak bilen, BMG-niň Tertipnamasynyň ýörelgeleriniň hem-de halkara hukugyň umumy ykrar edilen kadalarynyň esasynda Ählumumy howpsuzlyk strategiýasyny işläp düzmegiň mümkinçiliklerini ara alyp maslahatlaşdylar. Şeýle-de Aşgabatda Bitaraplyk we howpsuzlyk institutyny döretmegiň mümkinçilikleri, Bitaraplygyň dostlary toparynyň orny we goşandy bilen baglanyşykly pikir alyşmalar boldy.
Bellenilişi ýaly, Türkmenistanyň Bitaraplygy sebit we ählumumy derejedäki ýagdaýlary durnuklylaşdyrmaga, köp sanly syýasy, ykdysady, ynsanperwer hem-de ekologik meseleler çözülende döwletleriň, şeýle hem halkara guramalaryň hyzmatdaşlygynyň mazmunyna hem-de ugurlaryna oňyn täsir edýän gural hökmünde özüni barha işjeň görkezýär. Birleşen Milletler Guramasy bolsa parahatçylygy üpjün etmäge gönükdirilen wezipeleri üstünlikli durmuşa geçirmäge ýardam berýär.
Bitaraplyk hukuk ýagdaýy Garaşsyz Türkmenistanyň dünýä döwletleri bilen açyk, yzygiderli, netijeli gatnaşyklarynyň möhüm şerti bolup durýar. Watanymyz parahatçylyk söýüjilik, ylalaşyklylyk, hoşniýetlilik we ynsanperwerlik ýörelgelerini jemgyýetde, gündelik durmuşda ilerletmek bilen, bu düşünjeleri daşary syýasat strategiýasynda işjeň ulanýar. Şunuň bilen baglylykda, ýurdumyzyň Bitaraplygy türkmen halkynyň iň asylly häsiýetleriniň beýany bolup durýar.
Mejlisde Bitaraplyk syýasatynyň sebitiň ähli ugurlar boýunça häzirki zaman dünýä ösüşine tiz wagtda goşulyşmagyna ýardam berýändigi, syýasy nukdaýnazardan, Merkezi Aziýanyň durnukly ösýän, netijeli ykdysady gatnaşyklaryň pugtalandyrylýan sebitine öwrülmegine goşant goşýandygy-da nygtaldy. Bitaraplyk bu maksatlary we wezipeleri durmuşa geçirmegiň iň amatly nusgasyna, ýurdumyzyň daşary syýasatynyň mazmunynyň has sazlaşykly häsiýete eýe bolýan görnüşine öwrüldi.
Çykyş edenler şu gezekki duşuşygyň bu ugurda gazanylan tejribäni we netijeleri giňişleýin hem-de hemmetaraplaýyn maslahatlaşmak üçin amatly mümkinçilik berýändigini, halkara durmuşyň möhüm meseleleri boýunça hyzmatdaşlygyň täze, has täsirli gurallaryny işläp düzmek üçin şertleri döredýändigini bellediler. Munuň özi geljekde-de ýurtlaryň arasyndaky özara düşünişmegi, ynanyşmagy berkitmäge goldaw berer, öňde duran ählumumy maksatlaryň we wezipeleriň esasynda, mundan beýläk-de hyzmatdaşlygyň wajyp ugurlaryny kesgitlemäge mümkinçilik döreder.
