Türkmenistan Ýewropada Howpsuzlyk we Hyzmatdaşlyk Guramasy (ÝHHG) bilen iş gerimini giňeltmegi meýilleşdirýär. Bu ugurda görülýän çäreler hakynda Ministrler Kabinetiniň Başlygynyň orunbasary, daşary işler ministri R.Meredow sanly ulgam arkaly geçen hökümet mejlisinde habar berdi.
Türkmenistanyň Prezidenti Serdar Berdimuhamedowyň garamagyna ÝHHG bilen hyzmatdaşlygy mundan beýläk-de ösdürmek boýunça birnäçe teklip hödürlenildi. Hususan-da, türkmen bitaraplygynyň parahatlygy, howpsuzlygy we durnukly ösüşi üpjün etmekdäki möhüm ornuny açyp görkezmek maksady bilen, şu ýylyň birinji ýarymynda Aşgabat şäherinde «Ýewropada Howpsuzlyk we Hyzmatdaşlyk Guramasynyň sebitinde howpsuzlygy pugtalandyrmakda we ynamy berkitmekde bitarap ýurtlaryň orny» atly halkara maslahat geçirmek teklip edilýär. ÝHHG-ä agza ýurtlaryň hemişelik wekillerini bu çärä gatnaşmaga çagyrmak göz öňünde tutulýar.
Gün tertibine Türkmenistan tarapyndan başy başlanan Ählumumy howpsuzlyk strategiýasynyň esasy ugurlaryna, şeýle hem dürli halkara ýagdaýlary syýasy-diplomatik ýollar arkaly çözmekde bitaraplygyň möhüm gurallaryny ulanmak we syýasy dialogyň medeniýetini dikeltmek ýaly meseleler giriziler.
Mundan başga-da, Türkmenistan bilen bu guramanyň arasyndaky gatnaşyklary ösdürmek we giňeltmek maksady bilen, şu ýylyň mart aýynda ÝHHG-niň Baş sekretarynyň biziň ýurdumyza saparyny ýola goýmak barada teklip edildi.
Mundan başga-da, biziň döwletimiziň Ýewropada Howpsuzlyk we Hyzmatdaşlyk Guramasynyň Parlamentara Assambleýasynyň çäklerinde terrorçylyga garşy alnyp barylýan çärelere gatnaşygyny işjeňleşdirmek we Terrorçylyga garşy göreş komiteti bilen hyzmatdaşlygy artdyrmak ilkinji nobatda duran wezipelerdir. Şunuň bilen baglylykda, şu ýylyň aprel aýynda assambleýanyň wise-prezidenti we komitetiň başlygynyň biziň ýurdumyza iş saparyny guramak teklip edilýär.
Wise-premýer, daşary işler ministri Türkmenistanyň Bitaraplyk syýasatyny goldamak babatynda ikitaraplaýyn hyzmatdaşlygy güýçlendirmek maksady bilen, şu ýylyň maý aýynda Aşgabatda ÝHHG-niň Parlament Assambleýasynyň sebitleýin duşuşygyny geçirmek baradaky başlangyjyny beýan etdi.
Hormatly Prezidentimiz Serdar Berdimuhamedow hasabaty diňläp, beýan edilen teklipleri makullady hem-de ýurdumyzyň abraýly halkara guramalar, şol sanda ÝHHG bilen gatnaşyklaryny hemmetaraplaýyn ösdürmegiň döwletimiziň daşary syýasatynyň ileri tutulýan ugurlarynyň biri bolup durýandygyny belledi. Döwlet Baştutanymyz ÝHHG bilen hyzmatdaşlygy ähli ugurlar boýunça mundan beýläk-de pugtalandyrmagyň wajypdygyna ünsi çekip, wise-premýer, daşary işler ministrine meýilleşdirilen çäreleriň ählisiniň ýokary derejede guralmagyny üpjün etmegi tabşyrdy.
