2024-nji ýylyň 25-nji ýanwarynda Türkmenistanyň Özbegistan Respublikasyndaky Ilçihanasynda 2023-nji ýylyň jemlerine we 2024-nji ýylyň «Pähim-paýhas ummany Magtymguly Pyragy» ýyly diýlip yglan edilmegine bagyşlanan brifing geçirildi. Bu barada Türkmenistanyň DIM-i habar berýär.
Bu çärä Daşary işler ministrliginiň, Özbegistanda akkreditlenen diplomatik wekilhanalaryň, döredijilik we ylmy intelegensiýanyň, köpçülikleýin habar beriş serişdeleriniň wekilleri we talyp ýaşlar gatnaşdy.
Brifingiň dowamynda «Arkadag Serdarly bagtyýar ýaşlar» şygary astynda geçen 2023-nji ýylyň dowamynda içeri we daşary syýasatynda möhüm wakalar bilen beslenen Türkmen döwletiniň ýeten sepgitleri bellenildi.
Şeýle hem, Türkmenistanyň Prezidentiniň «Ýaşlar – Watanyň daýanjy» atly türkmen ýaşlarynyň durmuş-ykdysady, medeni-ynsanperwer we beýleki ugurlarda alyp barýan işlerine we üstünliklerine bagyşlanan ilkinji kitabynyň diňe bir ösüp gelýän ýaş nesliň wekilleri üçin däl-de, eýsem ýurduň ähli raýatlary üçin ýankitabyna öwrülendigi barada bellenildi.
Mundan başga-da, çäräniň dowamynda türkmeniň akyldar şahyry Magtymguly Pyragynyň doglan gününiň 300 ýyllygy mynasybetli milli we halkara derejesinde birnäçe çäreleriň geçirilmegi göz öňünde tutulýan 2024-nji ýyl «Pähim-paýhas ummany Magtymguly Pyragy» ýyly diýlip yglan edilmeginiň möhümdigi bellenildi.
