Şu ýyl Italiýanyň Aşgabatdaky diplomatik edarasynyň açylanyna 10 ýyl bolýar.

18-nji fewralda «Magtymguly Pyragynyň parahatlyk ýörelgesi we Bitarap Türkmenistanyň diplomatiýasy» atly halkara konferensiýada eden çykyşynda Italiýanyň Türkmenistandaky ilçisi Luiji Ferrari bu şanly sene mynasybetli birnäçe syýasy, medeni, işewür we bilim çäreleriniň geçiriljekdigini aýtdy. Ol iki ýurduň we bu ýurtlaryň halklarynyň arasynda dostluk hem özara düşünişmek ruhuny berkitmekde medeni diplomatiýanyň aýratyn ornuny belläp geçdi.

Türkmenistan bilen Italiýanyň arasynda diplomatik gatnaşyklar ýola goýlan wagtyndan bäri geçen döwrüň dowamynda dürli ugurlar boýunça ikitaraplaýyn gepleşik üstünlikli ösýär. Şeýlelik bilen, 2024-nji ýylyň 13-nji fewralynda hormatly Prezidentimiz Serdar Berdimuhamedow bilen bolan duşuşykda «Leonardo S.p.A.» kompaniýasynyň başlygy Stefano Pontekorwo Italiýanyň ýolbaşçylarynyň ikitaraplaýyn hyzmatdaşlygy pugtalandyrmaga uly ähmiýet berýändigini, şonuň bilen birlikde ýolbaşçylyk edýän kompaniýasynyň Türkmenistan bilen hyzmatdaşlygy mundan beýläk-de ösdürmäge taýýardygyny tassyklady.

Hyzmatdaşlygyň ileri tutulýan ugurlary ara alnyp maslahatlaşylanda, söwda we ykdysady ugurda, energetika we beýleki pudaklarda, şeýle hem hususy pudakda Türkmenistan bilen Italýan kompaniýalarynyň arasyndaky öndürijilikli gatnaşyklaryň özara işleşmek üçin uly mümkinçilik döretmäge ýardam edendigi bellenip geçildi.

2023-nji ýylda Italiýanyň Türkmenistandaky ilçihanasy ýurdumyzyň Medeniýet ministrligi bilen bilelikde meşhur kompozitor Juzeppe Werdiniň 210 ýyllygyna bagyşlanan, şeýle hem Italiýanyň opera we saz gurallarynyň meşhur eserleriniň konsertlerini geçirdi.

Şu ýylyň mart aýynda Aşgabatda iki ýurduň tanymal pianinoçylarynyň bilelikdäki konsertini guramak meýilleşdirilýär.