Milli bahar baýramynyň gününiň öňüsyrasynda Türkmenistanda «Eýjejik gyzjagaz – 2024» bäsleşiginiň jemleýji tapgyry geçirildi.

Türkmenistanyň Magtymguly adyndaky Ýaşlar guramasynyň Merkezi geňeşiniň we ýurdumyzyň Bilim ministrliginiň guran däbe öwrülen bu bäsleşige umumy bilim berýän orta mekdepleriň 2–4-nji synp okuwçylary gatnaşýar. Bäsleşigiň maksady zehinli gyzjagazlary ýüze çykarmakdan, ýaş nesliň milli amaly-haşam sungatyna gyzyklanmasyny höweslendirmekden ybaratdyr.

Bäsleşigiň şertlerine görä, gyzjagazlar üç – aýdym aýtmakda we labyzly goşgy okamakda, milli lybaslaryň özboluşlylygy barada çeper gürrüň bermekde we ýaş aýratynlyklaryna laýyklykda adaty senetçilik ussatlygyny görkezmekde synagdan geçýärler.

Bäsleşigiň jemi boýunça Daşoguz welaýatynyň Saparmyrat Türkmenbaşy etrabyndaky 93-nji orta mekdebiň 2-nji synp okuwçysy Nurşat Myradowa Türkmenistanda 2024-nji ýylda «Eýjejik gyzjagaz» diýlip ykrar edildi we baş baýraga mynasyp boldy. Birinji orny Arkadag şäherindäki iňlis dili çuňlaşdyryp öwredilýän 2-nji ýöriteleşdirilen orta mekdebiň 3-nji synp okuwçysy Aýmelek Gylyçmyradowa eýeledi. Ikinji orna Aşgabat şäherindäki 147-nji orta mekdebiň 2-nji synp okuwçysy Aýlar Çaryýewa, üçünji orna Lebap welaýatynyň Dänew etrabyndaky 2-nji orta mekdebiň 2-nji synp okuwçysy Aýna Döwletýarowa mynasyp boldular. Ýeňijilere şahadatnamalar we gymmat bahaly sowgatlar gowşuryldy.