Magtymguly Pyragynyň doglan gününiň 300 ýyllygynyň bellenilmeginiň öňüsyrasynda Türkmenistanyň Magtymguly adyndaky milli sazly drama teatrynda «Тürkmen binasy» atly konsert geçirildi.

Konsert Maýa Kulyýewa adyndaky Türkmen milli konserwatoriýasy we Türkmenistanyň Magtymguly adyndaky milli sazly drama teatry bilen bilelikde guraldy.

Konsert Wepamyrat Ödäýewiň tüýdükde ýerine ýetiren mylaýym sazy bilen açyldy. Bu saz ýerdäki ähli janly-jandarlaryň säher bilen nädip oýanýandygyny beýan edýän ýalydy. Sahnanyň Garrygalanyň daglary, ýagny Magtymguly Pyragynyň doglan we önüp-ösen ýeriniň şekilleri bilen bezelmegi hem bellärliklidir.

Soňra bolsa türkmen topragynda täze günüň başlanýandygyny aňladýan kirişli orkestriň ýerine ýetirmeginde «Pendi nagmalary» ýaňlandy. Magtymguly Pyragynyň goşgularyna döredilen «Dünýe, heý!» aýdymlar toplumyndan Türkmenistanyň halk artisti Atageldi Garýagdyýew «Ili gözlär» aýdymy bilen çykyş etdi.

Şol wagt Türkmenistanyň at gazanan artisti Ýagmyr Gurbannazarowyň ýerine ýetirmeginde sahnada Magtymguly goşgular kitabyny açdy we meşhur bariton owazyň astynda Magtymguly Pyragynyň goşgulary janlanan ýaly boldy. Konsertde «Uzuklar», «Begler» aýdym-saz rowaýatyndan «Gözelim», «Näzik aýdym» aýdymlary ýerine ýetirildi.

Konsertiň ahyryndaky çykyşlar tomaşaçylara has-da joşgun paýlady. Simfoniki orkestr, hor we solistler Röwşen Baýramow hem-de Begdurdy Çerkezow Magtymguly Pyragynyň goşgusyna «Türkmen binasy» atly odany ýerine ýetirdiler. Çykyş türkmenleriň bir döwlet bolmagyny arzuw eden Magtymguly Pyragynyň goşgusyny okamak bilen başlandy. Konsertiň adynyň hem şahyryň «Türkmen binasy» goşgusynyň adyndan alnandygy bellärliklidir.

Konsertiň ahyrynda tomaşaçylaryň yzygiderli el çarpyşmalary bilen Türkmenistanyň sungatda at gazanan işgäri, kompozitor Suhan Tüýliýew iki döredijilik toparynyň çykyşlaryny mähirli kabul edendikleri üçin diňleýjilere hoşallygyny aýtdy we olary türkmen halkynyň akyldar şahyry Magtymguly Pyragynyň doglan gününiň 300 ýyllygy bilen gutlady.