«Pähim-paýhas ummany Magtymguly Pyragy» şygary astynda geçýän şu ýyl beýik akyldaryň we şahyryň doglan gününiň 300 ýyllygynyň baýram edilmegine beslenýär. Şanly sene köp sanly çäreler: edebi bäsleşikler, sergiler, konsertler, döredijilik duşuşyklar hem-de Türkmenistanyň çäklerinden daşarda medeni çäreler bilen bellenilýär.
Magtymguly Pyragynyň adyny hem-de onuň dünýä edebiýatyna goşan uly goşandyna hormat goýmagyň dowamy hökmünde täze okuw ýylynyň ilkinji sapagyny şahyryň ajaýyp şahsyýetine bagyşlamak kararyna gelindi.
Bilimler we talyp ýaşlar gününde ilkinji jaňdan we dabaraly nyzamdan soň, ýurdumyzyň ähli okuw mekdeplerinde «Pähim-paýhas ummany Magtymguly Pyragy» diýen tema boýunça sapaklar geçiler.
Ençeme mekdeplerde ösüp gelýän nesilleriň aňynda türkmen edebiýatynyň nusgawy şahyrynyň keşbini kemala getirmäge gönükdirilen multimedia tanyşdyrmalaryny ulanmak arkaly sapaklar geçiler.
Okuwlarda oňa gatnaşyjylar şahyryň ömri we ykbaly barada gürrüň ederler, isleg bildirenler bolsa onuň goşgularyny okap bilerler. Terbiýeçiler we mugallymlar ýaşlar bilen bilelikde Magtymguly Pyragynyň doglan gününiň 300 ýyllygynyň baýram edilmegi bilen baglanyşykly ähmiýetli wakalary ýatlarlar, bu bolsa onuň medeni mirasa goşan goşandyna çuňňur akyl ýetirmäge mümkinçilik berer.
Paýtagtymyzyň täsin tebigatly künjeginde gurlan «Magtymguly Pyragy» medeni-seýilgäh toplumynyň açylmagy şu ýylyň ajaýyp wakalarynyň biri boldy.
Magtymguly Pyragynyň belent ýadygärligini, dürli ýurtlaryň we döwürleriň meşhur şahyrlarynyň hem-de akyldarlarynyň seýilgähini özünde jemleýän bu giň gerimli desga eýýäm, köp gelinýän ýere öwrüldi. Bu ýerde döredijilik duşuşyklar geçirilýär, şygyrlar okalýar we gezelenç edilýär.
Ilkinji sapagyň bir bölegi Gahryman Arkadagymyzyň edebi işlerine hem-de hormatly Prezidentimiz Serdar Berdimuhamedowyň «Ýaşlar – Watanyň daýanjy» we «Änew – müňýyllyklardan gözbaş alýan medeniýet» atly kitaplaryna bagyşlanar. Gadymy Änew şäheri 2024-nji ýylda «Türki dünýäsiniň medeni paýtagty» diýlip yglan edildi. Şu mynasybetli ol ýerde dürli medeni çäreler guraldy, şolar barada hem ilkinji sapagyň dowamynda ýatlanylyp geçiler.
Döwlet Baştutanymyzyň hem-de türkmen halkynyň Milli Lideri Gurbanguly Berdimuhamedowyň kitaplary halkymyzyň özboluşly taryhy geçmişini öwrenmäge ýardam edýär. Medeni mirasy gorap saklamagyň wajypdygyny nygtap, bu kitaplar ýaş nesilleriň we talyp ýaşlaryň watançylyk düşünjesini hem-de ruhy-ahlak terbiýesini kemala getirmekde aýratyn orun eýeleýär.
