Ýakynda Türkmenistanyň Jemgyýetçilik guramalary merkezinde akyldar şahyr Magtymguly Pyragynyň doglan gününiň 300 ýyllygyna bagyşlanan «Müň parasat, müň many, köňülleriň çyragy – Pähim-paýhas ummany Magtymguly Pyragy» atly bäsleşigiň ýeňijilerini sylaglamak dabarasy geçirildi. 

Bäsleşigi «Garagum» edebi žurnalynyň redaksiýasy Türkmenistanyň Magtymguly adyndaky Ýaşlar guramasynyň Merkezi geňeşi bilen bilelikde ýaşlaryň döredijilik işjeňligini höweslendirmek, ýaş ýazyjy-şahyrlary beýik şahyryň ömrüne we döredijiligine, eserlerinde watançylyk we ynsanperwer gymmatlyklaryny ählumumy diýip yglan eden ajaýyp pikirlerine bagyşlanan eserler döretmäge ruhlandyrmak maksady bilen guradylar. 

Türkmenistanda ýaşlary milli däp-dessurlar, ahlak we ruhy gymmatlyklar, baý medeni miras bilen tanyşdyrmaklyga aýratyn ähmiýet berilýär we onda beýik Magtymgulynyň döredijiligi aýratyn orun tutýar. Dörediji ýaşlar nusgawy şahyryň bimöçber şahyrana we pelsepe dünýäsinden ylham alýar, öz eserlerinde häzirki bagtly döwrüň aýratynlyklaryny, Garaşsyz Watanyň parahatçylyk söýüjilik, dostluk we hyzmatdaşlyk syýasatyna ygrarlydygyny açyp görkezýärler. Bäsleşige hödürlenen işlerde eserleri asyrlara aşan Magtymgulynyň dana pikirlerine sarpa çeper söz arkaly beýan edilýär. 

Bäsleşigiň şertlerine görä, ýaşlaryň goşgularynyň, hekaýalarynyň we beýleki işleriniň arasyndan eserler mazmunyň döwrebaplygy we çeperligi, žanr aýratynlyklary boýunça iň gowulary saýlanyp alyndy. Bäsleşigiň jemi boýunça ýeňijiler yglan edilip, olara Türkmenistanyň Magtymguly adyndaky Ýaşlar guramasynyň Merkezi geňeşiniň Hormat hatlary we ýadygärlik sowgatlary gowşuryldy, tapawutlanan işleriň awtorlary höweslendiriji baýraklar bilen sylaglanyldy.