Türkmenistanyň Döwlet simfoniki orkestriniň çeper ýolbaşçysy Resul Gylyjow Russiýa Federasiýasynyň Başgyrdystan Respublikasynyň Ufa şäherinde geçirilýän GDA agza ýurtlaryň döredijilik we ylmy intelligensiýanyň XVII forumynyň çäklerinde GDA-nyň Ýaşlar simfoniki orkestri we Başgyrdystanyň döwlet akademiki simfoniki orkestri bilen çykyş eder.

Ýaşlar simfoniki orkestriniň hatarynda abraýly saz bäsleşiklerinde baýrak alan Arkalaşygyň ýurtlaryndan zehinli sazandalar çykyş edýärler. Ufa şäherinde geçirilýän konsert maksatnamasynda Russiýada we daşary ýurtlarda meşhur nusgawy kompozitorlaryň eserleri ýaňlanar.

GDA-nyň Ýaşlar simfoniki orkestriniň GDA agza döwletleriň ynsanperwer hyzmatdaşlygy döwletara gaznasynyň başlangyjy bilen döredilendigini we ilkinji gezek 2007-nji ýylyň noýabr aýynda Astana şäherinde GDA agza ýurtlaryň döredijilik we ylmy intelligensiýanyň II forumy mynasybetli konsert üçin ýygnanandygyny ýatladýarys. Konserte Russiýanyň, Gazagystanyň we Tatarystanyň halk artisti Fuat Mansurow dirižýorlyk etdi.

2019-njy ýyldan bäri orkestre Russiýanyň halk artisti, «Arkalaşygyň ýyldyzlary» baýragynyň eýesi Sergeý Skripka ýolbaşçylyk edýär.

GDA-nyň Ýaşlar simfoniki orkestri her ýyl Azerbaýjan, Ermenistan, Belarus, Gazagystan, Gyrgyzystan, Özbegistan we Türkmenistan ýaly dürli ýurtlarda çykyş edip, çägini giňeldýär.

Başgyrdystanyň şu ýyl 450 ýaşyny belleýän paýtagtynda GDA agza ýurtlaryň döredijilik we ylmy intelligensiýanyň forumy ilkinji gezek geçirilýär. Bu çärä Arkalaşygyň ýurtlarynyň 200-den gowrak wekili gatnaşýar.

«Garaşsyz Döwletleriň Arkalaşygy: umumy gymmatlyklar we medeniýetleriň köpdürlüligi» forumyň esasy temasydyr. Çäräniň dowamynda ylym, bilim we sungat işgärleri kärdeşleriň özara gatnaşyklarynyň dürli taraplaryny: bilim pudagynda hyzmatdaşlygyň täze görnüşlerini, jemgyýetiň ösüşiniň çeşme hökmünde meýletinlik, we medeniýetleriň gatnaşyklarynyň kemala gelmeginde goşulyşma meselelerini ara alyp maslahatlaşarlar. Forum 19-njy sentýabrda tamamlanar.