Türkmenistanyň Garaşsyzlygynyň 33 ýyllygy mynasybetli geçiriljek köp sanly baýramçylyk çäreleriniň arasynda Garaşsyzlyk ýyllarynda ýurdumyzda amala aşyrylýan giňişleýin özgerişleriň gerimini we üstünlikleri açyk-aýdyň görkezýän ykdysady üstünlikleriniň sergisi aýratyn orun eýeleýär.

Bu ýyl ýyllyk gözden geçirilişiň paýtagtymyzyň «Garagum» myhmanhanasynyň golaýynda geçirilmegi meýilleşdirilýär, onuň açylyşy bolsa 19-njy sentýabra bellenipdir. Türkmenistanyň ministrlikleri we müdirlikleri, Türkmenistanyň Senagatçylar we telekeçiler birleşiginiň agzalary zähmetde gazananlaryny, önümlerini we hyzmatlaryny sergide görkezerler. Sergide görkezilýän önümler ykdysady, energetika we senagat, nebit-gaz, nebit-himiýa, dokma senagaty we halyçylyk, gurluşyk we gurluşyk serişdeleri, binagärlik, ulag, aragatnaşyk, oba hojalygy, işläp bejerýän we azyk senagaty, saglygy goraýyş we lukmançylyk senagaty, bilim, sport, syýahatçylyk, neşirýat işleri, tebigaty goramak we ş.m. ugurlary öz içine alýar.

Forumyň çäginde döwlet we hususy kärhanalaryň täze önümleriniň, maýa goýum taslamalarynyň we ykdysadyýetiň dürli pudaklary üçin geljegi uly ösüş maksatnamalarynyň tanyşdyrylyşyny guramak göz öňünde tutulýar. Mundan başga-da, haly dokamak, dutar ýasamak, küýzegärçilik we ş.m. halk senetlerini tanatmak üçin ussatlyk sapaklaryny geçirmek meýilleşdirilýär.