Mukaddes Garaşsyzlygymyzyň 33 ýyllyk şanly baýramçylygynyň öň ýanynda, ýola goýulan asylly däbe eýerip, Türkmenistanyň gurluşykçylary senagat, ykdysady we durmuş-medeni maksatly desgalary dabaraly ýagdaýda ulanmaga tabşyrýarlar. Daşoguz welaýatynyň Akdepe etrabynyň Andalyp şäherinde etrap aragatnaşyk bölüminiň täze binasynyň açylyş dabarasy geçirildi.
Täze bina Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Türkmenaragatnaşyk» agentliginiň «Daşoguztelekom» welaýat elektrik aragatnaşyk kärhanasynyň gurluşyk-abatlaýyş bölüminiň işçi-hünärmenleriniň güýji bilen guruldy. Bu ýerde meşhur Hytaý «HUAWEI» kompaniýasynyň sanly telefon stansiýasy oturdylyp, ol üç müňden gowrak müşderilere hyzmat etmäge niýetlenendir. Etrap aragatnaşyk bölüminiň döwrebap binasynda şäherara telefon aragatnaşygy, telefakslar, fakslar arkaly habarlary ýollamak nokatlary, awiakassalar, «Altyn asyr» milli elektroaragatnaşyk kompaniýasynyň kassalary, abunaçylara gündelik neşirleri, žurnallary bökdençsiz paýlamaga we beýleki poçta hyzmatyny etmäge niýetlenen bölümler, internet kafesi, ýörite otaglar ýerleşdirildi.
Täze binanyň açylyş dabarasyna welaýat hem-de etrap häkimlikleriniň wekilleri, Halk Maslahatynyň agzalary we Türkmenistanyň Mejlisiniň deputatlary, jemgyýetçilik guramalarynyň wekilleri, hormatly ýaşulylar we talyp ýaşlar gatnaşdylar.
Mary welaýatynyň Tagtabazar etrabynda-da täze aragatnaşyk kärhanasynyň açylyş dabarasy boldy. Ol «Marytelekom» operatory tarapyndan hödürlenilýän telefon we internet ulgamy bilen birlikde giň gerimli hyzmatlary amala aşyrmak maksady bilen aragatnaşyk serişdeleriniň döwrebap derejede netijeli işlemegini üpjün etmäge gönükdirilendir.
Aragatnaşyk kärhanasynyň iki gatly binasy ýurdumyzyň gurluşykçylary tarapyndan ýokary ölçeglere laýyklykda bina edildi. Mary welaýat häkimliginiň «Marytelekom» aragatnaşyk kärhanasy bu desganyň buýrujysy, potratçysy bolsa «Marygurluşuk» birleşiginiň dokuzynjy gurluşyk-gurnama müdirligi çykyş etdi.
Täze desganyň giň we ýagty önümçilik otaglarynda aragatnaşyk we tehniki işgärleriň 50-siniň oňaýly zähmet çekmegi üçin hemme şertleri bar. Kärhana Hytaýda öndürilen döwrebap enjamlar bilen enjamlaşdyrylyp, olar dürli tölegleriň giň görnüşlerinden başlap, onlaýn-kinoteatr işlerine çenli ýokary tehnologiýaly aragatnaşygy üpjün edýär. World TV hyzmat hem bolup, ol onlaýn-kinofilmleri giňeltmegiň goşmaça mümkinçiliklerine eýe bolan bütin dünýäden dürli meşhur teleýaýlymlary özünde jemleýär.
Daşoguz welaýatyndaky ýaly, bu ýerde hem baýramçylyk dabarasyna myhmanlar, welaýat hem-de etrap häkimlikleriniň ýolbaşçylary, gurluşykçylar, syýasy partiýalaryň we jemgyýetçilik guramalaryň wekilleri, hormatly ýaşulylar we ýaşlar gatnaşdylar. Iň gowy gurluşykçylara Türkmenistanyň Prezidenti tarapyndan dabaraly ýagdaýda gymmat bahaly sowgatlar gowşuryldy.
Mary we Daşoguz welaýatlaryndaky baýramçylyk dabaralary medeniýet we sungat ussatlarynyň konsertleri bilen utgaşdy. Dabaralarda çykyş edenler täze desgalaryň ulanylmaga berilmeginiň milli ösüş maksatnamalarynyň durmuşa geçirilmegi netijesinde mümkin bolandygyny bir agyzdan bellediler. Şol maksatnamalaryň göz başynda Türkmenistanyň Prezidenti Serdar Berdimuhamedow hem-de türkmen halkynyň Milli Lideri, Halk Maslahatynyň Başlygy Gahryman Arkadagymyz Gurbanguly Berdimuhamedow dur.
