2024-nji ýylyň 20-nji sentýabrynda Russiýa Federasiýasynyň Galmyk Respublikasynyň Elista şäherinde geçirilýän «Asyrlar boýy halklar bilelikde» atly sebitleýin forumyň çäginde Magtymguly Pyragynyň 300 ýyllygy mynasybetli «Bakylygyň nyşanlary: türkmen we galmyk halklarynyň arasyndaky dostluk-doganlyk köprüsi. Magtymguly Pyragynyň 300 ýyllygyna» atly halkara ylmy-amaly maslahat geçirildi.

Çäre türkmen we galmyk halklarynyň arasyndaky hyzmatdaşlygyň taryhy esaslaryny kesgitlemek meselelerini ara alyp maslahatlaşmaga, diňe bir ynsanperwerlik däl, eýsem Türkmenistan bilen Galmyk Respublikasynyň arasyndaky söwda-ykdysady gatnaşyklary berkitmek we giňeltmek mümkinçiliklerine baha bermäge bagyşlandy.

Maslahata Galmyk Respublikasynyň Halk Huralynyň (Parlament) Başlygy A.Mihaýlow, Galmyk Respublikasynyň Ýolbaşçysynyň geňeşçisi W.Salykow, Galmyk Respublikasynyň Halk Huralynyň deputaty we şol bir wagtyň özünde B.B.Gorodowikow adyndaky Galmyk döwlet uniwersitetiniň rektory B.Salaýew, Galmyk Respublikasynyň Halk Huralynyň XVII çagyryşynyň deputaty B.Haçirow, Türkmenistanyň Russiýa Federasiýasyndaky (Astrahan ş.) Konsuly G.Ilamanow, şeýle hem alymlar, syýasatşynaslar, ekologlar, uniwersitetleriň, Russiýanyň we GDA ýurtlarynyň seljeriş merkezleriniň wekilleri, B.B.Gorodowikow adyndaky Galmyk döwlet uniwersitetinde bilim alýan türkmen talyplary gatnaşdylar.

Öz çykyşynda G.Ilamanow Magtymguly Pyragynyň döredijiliginiň ynsanperwer ýörelgeleri wagyz etmekde, dünýä edebiýatynyň hazynasyny baýlaşdyrmakda we türkmen halkynyň gymmatlyklaryna düşünmekde ägirt uly goşant goşandygyny nygtady.

Şeýle hem maslahatyň çäginde türkmen halkynyň amaly-haşam, şekillendiriş sungatynyň we şaý-sepleriniň sergisi guraldy.