Ýurdumyzyň Garaşsyzlygynyň 33 ýyllygy mynasybetli Türkmenistanyň ykdysady üstünlikleriniň sergisi ýurdumyzyň dürli kärhanalarynyň üstünliklerini görkezýär.

Türkmenistanda ady belli harytlaryň biri bolan «TäçHil» hususy kärhanasy ýokary hilli önümleri bilen tanalýar. Kompaniýanyň diwarçasynda çyg süpürgiçler we antiseptikler, şeýle hem ýuwujy serişdeleriň ençeme görnüşi: kir ýuwujy, agardyjy, gap-gaç ýuwujy serişdeler, suwuk sabyn we şampun ýaly islegli harytlar görkezilýär.

«TäçHil» kompaniýasy 2006-njy ýylda işläp başlady, şondan bäri kärhana öndürýän önümleriniň görnüşini yzygiderli artdyrýar. Ol senagat we oba hojalyk önümlerini gaplamak üçin ulanylýan plastik paketleri öndürmekde ýöriteleşýär. Mundan başga-da, kompaniýa atyr, tebigy we organiki kosmetika, howa tämizleýjileri we şuňa meňzeş harytlary öndürýär.

– Häzirki wagtda hünärmenlerimiziň ünsi ekologiýa taýdan arassa zibil torbalaryny öndürmäge gönükdirilendir. Şeýle hem, ak we reňkli eşikler, ýüň we näzik matalar üçin kir ýuwujy önümleriň görnüşlerini artdyryp, olary dürli gaplarda öndürýäris – diýip, kärhananyň müdiri Nurmyrat Gurbangylyjow aýdýar.

«TäçHil» kompaniýasy önümlerini Özbegistana, Gazagystana we Gyrgyzystana eksport etmek arkaly ýurdumyzyň ykdysadyýetiniň ösmegine we onuň halkara derejesindäki ornuny pugtalandyrmaga uly goşant goşýar. Ýakynda bu türkmen kärhanasynyň önümleri Almatyda geçirilen Central Asia Beauty Expo VI halkara sergisinde görkezildi. Häzirki wagtda beýleki ýurtlar bilen eksport hyzmatdaşlygyny ýola goýmak boýunça gepleşikler alnyp barylýar.

Abraýly sergilere gatnaşmagy «TäçHil» hususy kärhanasy ýokary hilli ülňülere ygrarlydygyna şaýatlyk edýär, bu bolsa, öz gezeginde, ýerli önümlere ünsi özüne çekýär we halkara bazarynda oňa abraý getirýär.