TÜRKSOÝ-nyň Hemişelik geňeşiniň bölüm ýolbaşçylarynyň üçünji maslahat mejlisi Halkara türk medeniýeti guramasyna agza döwletleriň Medeniýet ministrleriniň Hemişelik geňeşiniň 2024-nji ýylyň ahyrynda Türkmenistanda geçiriljek 41-nji mejlisine taýýarlygyň çäginde Ankarada geçirildi.

Duşuşyga gatnaşanlar öňde duran mejlisiň gün tertibini we 2024-nji ýylda «Türki dünýäsiniň medeni paýtagty» Änewde geçiriljek beýleki çäreleri ara alyp maslahatlaşdylar.

Duşuşyga Türkmenistandan Daşary işler ministrliginiň Halkara guramalar bölüminiň birinji kätibi F.Myradowa we Türkmenistanyň Medeniýet ministrliginiň daşary ýurtlar bilen gatnaşyklar bölüminiň baş hünärmeni R.Hojanyýazow gatnaşdy.

Maslahatda çykyş etmek bilen, TÜRKSOÝ-nyň Baş kätibiniň orunbasary Saýit Ýusuf TÜRKSOÝ guramasynyň özüniň agza ýurtlary tarapyndan türk dünýäsiniň medeni mirasyny goramak we wagyz etmek bilen çäklenmän, eýsem, Gündogar Ýewropada, esasanam, türk doganlarymyzyň ýaşaýan ýeri bolan Balkanlarda möhüm taslamalary durmuşa geçirýändigini belledi we şunuň bilen baglanyşyklylykda guramanyň käbir soňky işleri barada gürrüň berdi. Saýit Ýusuf TÜRKSOÝ-a agza ýurtlaryň Medeniýet ministrlikleriniň we beýleki gyzyklanýan guramalaryň bu çäreleriň durmuşa geçirilmegine goşýan goşandyny belläp, şeýle duşuşyklaryň bilelikdäki çäreleri mundan beýläk-de meýilleşdirmek işinde möhüm ähmiýetiniň bardygyny nygtady.