Türkmenistanda maldarçylygy ösdürmek boýunça toplumlaýyn işleriň çäklerinde käbir tohum mallardan ýokary hilli mermer et öndürmek boýunça telekeçilik işi işjeň ösdürilýär.

Içerki bazary et we süýt önümleri bilen üpjün edýän esasy kompaniýalaryň biri-de Ahal welaýatynyň Bäherden etrabynda ýerleşýän «Ajaýyp ussat – halal önümler» Hojalyk jemgyýetidir. Ýurt Garaşsyzlygynyň 33 ýyllygyna bagyşlanan Türkmenistanyň ykdysady üstünlikleriniň sergisinde kärhana öz önümlerini, şol sanda et önümlerini görkezdi.

2015-nji ýylda işe girizilen maldarçylyk toplumynda ýokary öndürijiligi we gowy süýtlüligi bilen tanalýan naýbaşy golştin sygyrlary ösdürilip ýetişdirilýär. Mundan başga-da, bu ýerde garaköli we saryja tohumly goýunlar ösdürilip ýetişdirilýär.

«Ajaýyp ussat – halal önümler» kärhanasynyň hünärmenleriniň aýtmagyna görä, golştin sygyrlary dürli iýmit şertlerine gowy uýgunlaşýarlar. Ýokary süýtlüligi onuň dükanlara we ýöriteleşdirilen kärhanalara iberilmegini üpjün edýär.

2018-nji ýylda mermer et, şeýle hem ýokary hilli sygyr etini öndürmek üçin täze toplum açyldy. Bu maksat bilen Şotlandiýada ýetişdirilýän aberdin-angus tohumly 60 baş gara mal Germaniýadan, soňra bolsa Russiýadan satyn alyndy.

Häzirki wagtda fermanyň 10 müň gektar ýerinde ýokary hilli süýt we golştin hem-de simmental tohumly gara mallardan ýokary hilli et önümleri öndürilýär. Mermer et aberdin-angus tohumly mallardan alynýar.

Fermer hojalygynda önüm öndürijiligini ýokarlandyrmaga, ýurduň ykdysadyýetine mynasyp goşant goşmaga we ilaty ýokary hilli et hem-de süýt bilen üpjün etmäge aýratyn üns berilýär.