Aba Annaýew adyndaky Halkara atçylyk akademiýasynda Arkadag şäherindäki mekdepleriň  okuwçylarynyň arasynda Magtymguly Pyragynyň goşgularyny çeper okamak boýunça bäsleşik geçirildi. «Pyragynyň paýhas hazynasy» atly bu çärä akademiýada, Berdimuhamet Annaýew adyndaky mugallymçylyk orta hünär okuw mekdebinde, Saçly Dursunowa adyndaky lukmançylyk orta hünär okuw mekdebinde we Sahy Jepbarow adyndaky ýörite sungat mekdebinde okaýan ýaşlar gatnaşdy.

Bäsleşigiň şertlerine görä, oňa gatnaşýanlar üç tabşyrygy ýerine ýetirmelidi. Ilki bilen, bäsdeşler çeper sözüň beýik ussadynyň goşgusyny sahnalaşdyryp, ýerine ýetirmekde bäsleşdiler. Bäsleşigiň ikinji şerti Magtymgulynyň eminler tarapyndan teklip edilen bir eserini çeper okamagy we onuň çuňňur manysyny düşündirmegi talap edýärdi. Üçünji şerte görä, talyplar Magtymgulynyň goşgusyny ýazylan iki setiri boýunça kesgitläp, ony dowam etdirmelidi. Gyzykly geçen bäsleşik Türkmenistanyň ýaş nesliniň beýik akyldar şahyr Magtymguly Pyragynyň eserlerine gowy beletdigini görkezdi, çünki olar bu goşgularda özleri üçin durmuş sapaklaryny we çelgilerini tapýarlar.

Bäsleşigiň netijeleri boýunça ýeňijilere we oňa işjeň gatnaşanlara Aba Annaýew adyndaky Halkara atçylyk akademiýasynyň Hormat hatlary we Türkmenistanyň Magtymguly adyndaky ýaşlar guramasynyň Arkadag şäher geňeşiniň ýadygärlik sowgatlary gowşuryldy.