Türkmenistanyň Jemgyýetçilik guramalary merkezinde ýurduň ýaşlary bilen iki sany onlaýn duşuşyk bolup geçdi, bu çäreleri Magtymguly adyndaky ýaşlar guramasynyň Merkezi Geňeşi gurady.
«Türkmenistanyň Halk Maslahatynyň taryhy çözgütleri – ýaşlar syýasatynyň täze başlangyçlary we kämil geljegi gurmagyň möhüm ýoly» atly birinji duşuşyk 24-nji sentýabrda bolup geçen Türkmenistanyň Halk Maslahatynyň taryhy kararlaryna, döwlet ýaşlar syýasatyny durmuşa geçirmek işindäki täze başlangyçlara we wezipelere bagyşlandy. Oňa Ýaşlar guramasynyň Merkezi, Aşgabat, Arkadag şäherleriniň, welaýat, şäher we etrap geňeşleriniň agzalary, dürli pudaklarda zähmet çekýän ýaş hünärmenler, şeýle hem maslahatlaşma öz okuw mekdeplerinde internet arkaly goşulyşan ähli ýokary okuw mekdepleriň mugallymlary we talyplary gatnaşdy.
Çäräniň barşynda Magtymguly adyndaky Ýaşlar guramasynyň Merkezi Geňeşiniň başlygy Ýazpolat Keriýew, Türkmenistanyň Mejlisiniň, senagatçylar we telekeçiler partiýasynyň, Telekommunikasiýa we maglumat institutynyň, Döwletmämmet Azady adyndaky Türkmen milli dünýä dilleri institutynyň, Magtymguly adyndaky Türkmen döwlet uniwersitetiniň, Ylymlar akademiýasynyň halkara ylmy- tehnologiýa parkynyň, Arkadag şäheriniň Ene we çaga saglygyny goramak merkeziniň wekilleri we beýlekiler çykyş etdiler.
Çykyş edenler Halk Maslahatynda kabul edilen möhüm kararlar, öňe sürlen başlangyçlar we öňde goýlan wezipeler barada gürlemek bilen, öz ugurlary boýunça olary ýerine ýetirmäge taýýardyklaryny beýan etdiler. Çykyşlarda bellenişi ýaly, döwlet Baştutanymyz ýaşlaryň mümkinçiliklerini hemmetaraplaýyn ýüze çykarmak, olaryň jemgyýetçilik-syýasy durmuşyna we parahatçylykly döwlet syýasatyna, esasy milli maksatnamalary durmuşa geçirmäge işjeň gatnaşmagy üçin ähli mümkinçilikleri we şertleri döredýär. Ýigitdir gyzlaryň ýurdumyzyň ýagty we gülläp ösýän geljegini üpjün etmäge ukyply hakyky watanperwer bolup ýetişmeklerine ägirt uly üns berilýär.
Türkmenistanyň Magtymguly adyndaky ýaşlar guramasynyň merkezi Geňeşiniň guran «Sanly dünýä: Ýaşlar. Ösüş. Geljek» atly ikinji onlaýn duşuşygy sanlylaşdyrma mowzugyna we onuň bilen baglanyşykly kiberhowpsuzlyga bagyşlandy. Çärä dürli kärhanalarda we edaralarda işleýän ýaşlar, ýurdumyzyň ýokary okuw jaýlarynyň talyplary we mugallymlary gatnaşdy. Ilkinji bolup çykyş eden Magtymguly adyndaky ýaşlar guramasynyň Merkezi Geňeşiniň başlygy Ýazpolat Keriýew ýurdumyzda amala aşyrylýan ykdysadyýetiň sanly geçişiň, döwlet we jemgyýetçilik durmuşynyň ähli ugurlaryna innowasion tehnologiýalary girizmegiň, möhümdigini belledi. Bu işde uly wezipe bilimlerini we ýurdumyzyň ösüşi üçin täze mümkinçilikleri ýüze çykarýan sanly tehnologiýany ulanmak endiklerini kämilleşdirmeli boljak ýaşlaryň paýyna düşýär.
Türkmenistanyň Baş prokuraturasynyň we Içeri işler ministrliginiň wekilleri öz çykyşlarynda ýaşlaryň ünsüni kiberhowpsuzlyk meselelerine, sanly ulgamyň hukuk esaslaryna, internetiň sosial-psihologik täsirine çekdiler. Ylymlar akademiýasynyň ylmy-tehnologiýa parkyndan we «Türkmenaragatnaşyk» gullugyndan gelen çykyş edijileriň nygtaýşy ýaly, barha ösýän sanlylaşma we internete bolan giň elýeterlilik bilen bir hatarda ýaşlaryň kibersowatlylygy we kibermedeniýeti-de bolmalydyr.
