A.S.Puşkin adyndaky döwlet rus drama teatrynyň döredijilik topary Balkan welaýatyna saparynyň çäklerinde Hazar şäherçesinde ilkinji gezek çykyş etdiler.

Bu ýerdäki mekdepler we çagalar baglary çykyşlar üçin özboluşly meýdança öwrüldi, şonuň üçin çagalar hem-de olaryň ene-atalary gyzykly spektakllara tomaşa etdiler.

Üç günüň dowamynda Hazarda «Üç jojuk we çal möjek» atly meşhur çagalar ertekisi we adamzat üçin möhüm temalary gozgaýan «Uýalar» atly dartgynly spektakl görkezildi.

Aýdym-sazly, tansly we gülküli sahnaly «Söýgi ylhamy» atly konsert aýratyn gyzyklanma döretdi. Tomaşalaryň ählisinde tomaşaçylardan ýaňa zalda ýer ýokdy, bu bolsa tomaşaçylaryň teatryň çykyşlaryna isleginiň ýokarydygyny görkezýär.

Hazaryň ýaşaýjylary artistlere teatr sungatyna aralaşmaga we ýiti duýgulary oýaran çykyşlary üçin hoşallyk bildirdiler. Tomaşaçylaryň köpüsi artistler bilen söhbetdeş bolmaga we olar bilen bilelikde ýadygärlik surata düşmäge höwes bildirdiler. 7-nji oktýabrda Balkanabat şäherinde başlanan sapar artistler bilen tomaşaçylaryň dostlukly we ýürekdeş gatnaşyklary aýdyň görkezdi.

A.S.Puşkin adyndaky döwlet rus drama teatrynyň döredijilik topary Balkan welaýatyna sapary döwründe 30-dan gowrak spektakllary görkezdiler, olaryň her biri tomaşaçylaryň ýüreginde ýatdan çykmajak yz galdyrdy. Artistler indi «Mollagara» şypahanasynda çykyş ederler. Gadymy Uzboýyň Gündogar kenaryndaky Balkanabat şäheriniň golaýynda ýerleşýän bu şypahana mineral palçygy, şor köli we şypaly howasy bilen meşhurdyr. Bu ýerde artistler «Söýgi ylhamy» konsertini görkezmegi meýilleşdirýärler.

A.S.Puşkin adyndaky döwlet rus drama teatrynyň sapary ýurdumyzyň Günbatar sebitiniň medeni durmuşynda şanly waka boldy. Şu ýylyň fewral aýynda teatryň döredijilik topary Balkanabat şäheriniň Beýik Saparmyrat Türkmenbaşy adyndaky döwlet drama teatrynyň sahnasynda çykyş edip, Balkan welaýatynyň Medeniýet öýleriniň birnäçesinde spektakllaryny görkezdi.