XVII asyryň lirik şahyry Garajaoglanyň terjimehaly hakynda maglumat az, ýöne edebiýatşynaslaryň esasy pikirine görä, ol ýaşlygynda söýgülisini elden gidiripdir we bütin ömrüni onuň gözlegine sarp edipdir.

Türkiýe Respublikasynyň Siwas şäheriniň döwlet teatrynyň döredijilik topary şahyryň yşk hekaýatynyň täze beýany bilen Beýik Saparmyrat Türkmenbaşy adyndaky Baş akademiki drama teatrynda çykyş etdi.

Bir obanyň ilaty Garajaoglana magşugyny tapmaga ýardam edýär. Aşyklar bagt kölünde guwwas bolup ýüzýärdiler. «Garajaoglan» sahna oýnunda türk aktýorlarynyň erkinligini duýmak bolýardy. Olar sahnadan daşgary ötelgeleri-de işjeň ulanmak bilen, wakalary tomaşa zalyna geçirýärdiler. Baş gahrymanyň sahnada aýdym aýtmasy oýna uly bähbit boldy.

Tomaşaçylar oýny döredijilere aýak üstünde el çarpdylar. Olar bilen hoşlaşmak üçin sahna çykylanda, aşyklaryň bilelikde däl-de, özleriniň wysala ýetmegine ýardam eden oba ilatynyň gurşawynda çykmasy bellemäge mynasyp hereketdir. Tomaşaçylar halan aktýorlaryna gül desselerini gowşurdylar.