Lebap welaýatynyň Çärjew etrabynyň Talhanbazar geňeşliginiň çäginde ýerleşýän, Türkmenistanyň Senagatçylar we telekeçiler birleşmesiniň agzasy «Altyn bürgüt» hususy kärhanasynda ýurdumyzda kiçi we orta telekeçiligi ösdürmek boýunça döredilip berilýän şertler esasynda işler toplumlaýyn ýola goýulýar.
Kärhanada döwrebap ýyladyşhana toplumy bilen bilelikde polietilen we polipropilen haltalarynyň, plastik gaplaryň önümçiliginiň utgaşykly alnyp barylmagy ýokarda aýdylanlara aýdyň şaýatlyk edýär.
Hususy kärhananyň önümçiligi jemi 8,5 gektar meýdanda ýerleşýär we ol 6 bölekden ybarat ýyladyşhanalar toplumyndan ybarat bolup, bu ýerde pomidoryň 192 müňden gowrak düýbi ösdürilip ýetişdirilýär. Ýyladyşhana häzirkizaman innowasion tehnologiýalary bilen enjamlaşdyrylyp, pomidor nahallaryny iýmitlendirmek, howa çalşygyny amala aşyrmak, durnukly ýylylygy saklamak işleri awtomatiki usulda kompýuterleriň üsti bilen amala aşyrylýar. Desgada pomidor nahallarynyň düýp emele getirişine, ösüşine, hasyla durşuna ýörite synag enjamlarynyň üsti bilen hünärmenler tarapyndan yzygiderli gözegçilik amala aşyrylýar. Bu döwrebap ýyladyşhananyň esasy aýratynlyklarynyň biri hem pomidor nahallarynyň kokos gabygynyň gyryndylary ýerleşdirilen gaplarda ýetişdirilýänligindedir.
Pomidor nahallarynyň güllän mahaly tozanlandyryş işleriniň ýörite arylaryň üsti bilen amala aşyrylmagy hem nahallaryň şol bir wagtda hasyla durmagyna we pomidorlaryň deň ululykda ýetişmeklerine ýardam edýär. Bu ýerde agrotehniki kadalaryň doly berjaý edilmegi pomidoryň bol hasylyny ýetişdirmeklige, ýagny her düýpden ortaça 13 kilogram, her gektardan bolsa, 230 – 250 tonna, ýylyň dowamynda hem 2 müň tonna töweregi ýokary hilli, ekologik taýdan arassa pomidor hasylyny almaklyga mümkinçilik berýär. Hususy kärhanada öndürilýän pomidor hasylynyň agramly bölegi daşary ýurtlara, hususan-da, Russiýa Federasiýasy, Gazagystan ýaly döwletlere eksport edilýär. Şu ýylyň dowamynda daşary döwletlere çykarylan pomidoryň mukdarynyň 500 tonnadan geçendigini hem bellemek bolar.
«Altyn bürgüt» hususy kärhanasynda senagat önümlerini, ýagny polietilen turbalary, polipropilen haltalary, şeýle hem azyk önümlerini saklamaklyga niýetlenen plastik gaplary öndürmeklik hem göwnejaý ýola goýlupdyr. Önümçiligiň bu görnüşleri üçin zerur bolan esasy çig mal Türkmenbaşynyň nebiti gaýtadan işleýän zawodlar toplumyndan alynýar. Kärhana boýunça her ýylda bir müň tonnadan gowrak polietilen haltasy öndürilip, onuň hem aglaba bölegi eksporta ugradylýar. Şu ýylyň başyndan bäri polipropilen haltalaryň 800 tonnadan gowragynyň Russiýa Federasiýasyna eksport edilmegi öndürilýän önümleri ýerleşdirmek boýunça hem netijeli işleriň amala aşyrylýandygyna şaýatlyk edýär. Berkarar döwletiň täze eýýamynyň Galkynyşy döwrüniň belent ruhunda iş alyp barýan «Altyn bürgüt» hususy kärhanasy geljekde önümçiligiň gerimini has-da giňeltmegi maksat edinýär.
