6-njy noýabrda Halkara Bitaraplyk güni we Birleşen Milletler Guramasynyň Baş Assambleýasynyň «Türkmenistanyň hemişelik Bitaraplygy» atly Kararnamany kabul etmeginiň 29 ýyllygy mynasybetli Türkmenistanyň Bilim ministrligi we Magtymguly adyndaky Ýaşlar guramasynyň Merkezi Geňeşi tarapyndan yglan edilen «Merdana nesil – 2024» atly bäsleşigiň birinji tapgyry başlanýar.
Bäsleşik orta mekdepleriň 3–5-nji synp okuwçylarynyň arasynda oglanlary watançylyk, merdana eždatlarymyzyň däplerine hormat goýmak we zähmetsöýerlik ruhunda terbiýelemek maksady bilen geçirilýär. Bäsleşik dört tapgyrda geçiriler: 6–15-nji noýabrda ýurdumyzyň orta mekdeplerinde, 18–23-nji noýabrda birinji tapgyrda birinji we ikinji orny eýelän okuwçylaryň gatnaşmagynda etraplarda we şäherlerde, 25-nji noýabr – 1-nji dekabr aralygynda bolsa ikinji tapgyrda birinji we ikinji orny eýelän okuwçylaryň gatnaşmagynda Aşgabat we Arkadag şäherlerinde geçiriler.
Bäsleşigiň jemleýji dördünji tapgyry dekabr aýynyň ilkinji on günlüginde Aşgabatda geçiriler we üçünji tapgyrda birinji, ikinji orunlary eýelän okuwçylar oňa gatnaşarlar. Bäsleşigiň şertlerine görä, oňa gatnaşýanlar üç tabşyrygy ýerine ýetirmeli bolarlar: türkmen halkynyň edermenligi, Watana söýgüsi, ata-babalarymyzyň gahrymançylykly ruhy we döwrümiziň ägirt edermenlikleri barada çeper görnüşde gürrüň bermeli (3 minut); özbaşdak gülküli, gyzykly çykyş görkezmeli (3 minut); Berkarar döwletiň täze eýýamynyň Galkynyşy döwründe ýurdumyzyň gazananlaryny, bagtyýar çagalygy we dostlugy wasp edýän aýdym-saz eserini ýerine ýetirmeli (5 minut).
Bäsleşigiň jemleýji tapgyrynyň netijeleri boýunça, baş baýraga mynasyp bolan we birinji, ikinji hem-de üçünji orunlary eýelän mekdep okuwçylaryna Türkmenistanyň Bilim ministrliginiň we Magtymguly adyndaky Ýaşlar guramasynyň Merkezi Geňeşiniň Hormat hatlary we ýadygärlik sowgatlary gowşurylar. Bäsleşigiň etrap, şäher we welaýat tapgyrlaryna işjeň gatnaşyp tapawutlanan mekdep okuwçylary, Türkmenistanyň Magtymguly adyndaky Ýaşlar guramasynyň ýerli geňeşlerinden Hormat hatlaryny we ýadygärlik sowgatlaryny alarlar.
Goşmaça maglumaty 44-86-40 (Türkmenistanyň Bilim ministrligi) we 44-88-55, 44-88-85 (Magtymguly adyndaky Ýaşlar guramasynyň Merkezi Geňeşi) belgili telefonlar boýunça bäsleşigiň guramaçylaryndan alyp bilersiňiz.
