Şu gün Aşgabatda telearagatnaşyk, telemetriýa, habar beriş tilsimatlarynyň we teleradioýaýradyş enjamlarynyň «Türkmentel – 2024» atly XVII halkara sergisi we ylmy maslahaty öz işine başlady.
Däp bolşy ýaly, «Türkmentel – 2024» atly XVII halkara sergisiniň we ylmy maslahatynyň açylyş dabarasynda Türkmenistanyň hormatly Prezidenti Serdar Berdimuhamedowyň Gutlagy okaldy.
Hormatly Prezidentimiz «Türkmentel – 2024» atly XVII halkara sergisiniň we ylmy maslahatyň ähmiýetine ünsi çekip, ösüşiň innowasion ýoluny üpjün edýän telekommunikasiýa ulgamyny kämilleşdirmekde, dünýä ähmiýetli iri taslamalary, milli maksatnamalary durmuşa geçirmekde telearagatnaşyk, telemetriýa, habar beriş tilsimatlarynyň we teleradioýaýradyş enjamlarynyň «Türkmentel — 2024» atly XVII halkara sergisiniň we ylmy maslahatyň ähmiýetiniň hem örän uludygyny aýtdy.
Ýokary tehnologiýa we innowasiýa boýunça dünýä tejribesine daýanýan Türkmenistan, milli ykdysadyýeti döwrebaplaşdyrýar we ýurduň hemmetaraplaýyn ösüşinde uly üstünlikleri gazanýar.
Ýurdumyz sanly tehnologiýalaryň gurluşyny, häzirki döwrüň talaplaryna laýyklykda maddy, tehniki we hukuk binýadyny gowulandyrmak bilen düýpli ylmy-tehniki özgertmeleri amala aşyrýar we iri taslamalary durmuşa geçirýär.
Şu günler Aşgabada gelen onlarça daşary ýurt kompaniýalarynyň we firmalarynyň arasynda ABŞ-nyň «Space X» kompaniýasy ilkinji gezek sergä gatnaşýar. ABŞ-nyň «Space X» kompaniýasynyň wekili Ýelena Paýşer:
– Türkmenistanda şular ýaly wekilçilikli foruma ilkinji gezek gatnaşýandygymyza garamazdan, bu Türkmenistanly kärdeşlerimiz bilen ilkinji gezek hyzmatdaşlygymyzy aňlatmaýar. Mälim bolşy ýaly, ozal kompaniýamyzyň hünärmenleri taslamanyň işlenip düzülmegine gatnaşdy we Kanawerelden (ABŞ) «Türkmen Älem 52 0E» ilkinji türkmen aragatnaşyk hemrasy kosmos orbitasyna uçuryldy. Kompaniýamyz ençeme ýyl bäri aragatnaşyk hemrasyny uçurýar we beýleki hyzmatlary hem ýerine ýetirýär. Sergi hakynda aýtsam, onda iň ýakymly duýgulara eýe boldum, sergi we ylmy maslahat ýokary derejede guralypdyr we guramaçylara sag bolsun aýdýaryn. Türkmenistanyň paýtagty Aşgabat ajaýyp şäher we onuň gözelligi ajaýyp täsirleri döredýär – diýip, gürrüň berdi.
Ýelena Paýşeriň rus dilini nireden gowy bilýändigini soranymyzda, ol özüniň aslynyň Sankt-Peterburgdandygyny we şu günki günde kompaniýanyň esasy işgärlerinden biridigini buýsanç bilen aýtdy.
«Türkmentel — 2024» atly XVII halkara sergisi we ylmy maslahaty öz işini dowam edýär.
