Türkmenistanda Ýewropa Bileleşiginiň Medeniýet hepdeliginiň çäklerinde Türkmenistanyň Medeniýet ministrligi we Germaniýa Federatiw Respublikasynyň Aşgabatdaky ilçihanasy bilen bilelikde nemes nusgawy sazlarynyň meşhur eserleriniň gala-konsertini gurady. Konsert Magtymguly adyndaky milli sazly drama teatrynda geçirildi.

Konsertde «Klenke» kirişli saz topary (kwartet) we dört kirişli kontrabas saz guralyny çalýan Alf Mozer çykyş etdiler. «Klenke» kwarteti 30 ýyldan bäri nemes sazlaryndan ybarat çykyşlary bilen Germaniýada we dünýäde giňden tanalýar. Döredijilik toparynyň hatarynda Annegret Klenke (birinji skripka), Beate Hartmann (ikinji skripka), Iwonn Ulemann (alt) we Rut Kaltenhoýzer (wiolençel) çykyş edýärler. 

Konsertde Gendeliň, Mosartyň, Weberiň, Şumanyň, Strausyň, Regeriň we Legaryň eserleri ýaňlandy. Bu meşhur kompozitorlaryň terjimehaly Germaniýa bilen baglanşyklydyr. Konsertiň alyp baryjysy Selbi Ýomudowa her eseri we onuň awtory barada iňlisçe gürrüň berdi.

Gendeliň «Messiýa» oratoriýasyndan «Rejoice» ariýasyny Narine Ýegiýan ýerine ýetirdi, ol jadylaýjy owazy bilen tomaşaçylary özüne maýyl etdi. Germaniýada bu eser Roždestwoda her öýde diýen ýaly ýerine ýetirilýär.

Gala-konsertde nemes halkynyň arasynda meşhur bolan nemes sazlarynyň romantik, liriki we sentimental eserleri ýaňlandy.

Diňleýjiler nemes sazandalarynyň ýerine ýetirmeginde nemes kompozitorlarynyň eserlerini uly gyzyklanma bilen diňlediler. Aşgabatly tomaşaçylaryň uzak wagtlap el çarpmagynda myhmanlar konsertde göz öňünde tutulmadyk Kraýsleriň «Söýgi oýny» we Rossininiň «O mio babbino caro» eserlerini ýerine ýetirdiler.