Ykdysadyýetiň dürli pudaklarynda dürlüligiň we goşulyşmagyň möhümligi baradaky düşünjäniň artmagy netijesinde, ulag pudagynda zenanlaryň tutýan ornunyň ähmiýeti barha artmaga başlaýar.
«Halkara ulag-üstaşyr geçelgeleri: özara arabaglanyşyk we ösüş – 2024» atly halkara maslahatynda we sergide ara alnyp maslahatlaşylan temalaryň biri-de «Zenanlar – ulag ulgamynda: ýolbaşçylyk we ösüş mümkinçilikleri» sessiýasy boldy. «Tegelek stol» başynda dyngysyz ösüp barýan bu pudakda ýolbaşçy wezipeleri eýeleýän we onuň ösüşine möhüm goşant goşýan zenanlar duşuşdylar.
Wajyp meseleleri ara alyp maslahatlaşmaga Kärdeşler arkalaşyklarynyň Milli merkeziniň we Zenanlar birleşiginiň Merkezi geňeşiniň başlygy Oguljennet Berdiliýewa, Täjigistan Respublikasynyň Ulag ministriniň orunbasary Şaista Saidmuradzada we USAID-iň «Merkezi Aziýada söwda» taslamasynda ulag geçelgelerini ösdürmek boýunça geňeşçi Aýjan Beýseýewa dagy gatnaşdy. Duşuşyga Täjigistanyň Hünärmen maslahatçylar geňeşiniň (UPCT) başlygy Larisa Kislýakowa ýolbaşçylyk etdi.
Häzirki wagtda zenanlar logistika pudagynda gowy netijeler görkezýärler. «Dört Tarap Logistika» kompaniýasynyň müdiri Anna Titowa, «Döwrebap ulag merkezi» kompaniýasynyň müdiri Mähri Arrykowa we ulag-logistika boýunça hünärmen Sähra Amanowa dagy ýeten derejeleri we üstünlikli taslamalara gatnaşmak boýunça tejribeleri barada gürrüň berdiler.
Zenan ýolbaşçylar olaryň ulag pudagynyň işine gatnaşmaklary işleriň amatlaşdyrylmagyna we haryt akymlarynyň netijeli dolandyrylmagyna goşant goşýan täze pikirleridir çemeleşmeleri getirýändigini nygtadylar. Toparlarda pikirleriň dürlüligi kompaniýalara çalt üýtgeýän bazar şertlerine uýgunlaşmaga mümkinçilik berýän innowasiýa strategiýalaryny ösdürmekde esasy orny eýeleýär.
Mähri Arrykowa hakyky ýolbaşçylygyň ýeňil wezipe däl-de, agyr zähmetdigini belledi. Şeýle-de bolsa, ýolbaşçy wezipelerde zenanlaryň sany artmagyny dowam etdirýär. Korporatiw pudakda gender deňligi esasy çekişme mowzugyna öwrüldi. Dürli jähetleri yzygiderli derňemek ýurdumyzdaky aýal-gyzlar üçin erkekler bilen deň esasda ulag pudagynda işlerini üstünlikli alyp barmaga mümkinçilik döretdi.
Çäräniň ahyrynda «WiLAT Türkmenistanyň» wekili Sähra Amanowa Patyşalyk ulag we logistika institutynyň (Beýik Britaniýa) agzalyk şahadatnamasy berildi. «WiLAT» (Logistika we ulag pudagyndaky zenanlar) – bu ugurda aýal-gyzlaryň derejesini ýokarlandyrmagy öz öňünde wezipe edip goýan CILT-iň bölümidir. Gurama, ulag we logistika pudagynyň zenan wekilleriniň wezipede ösüşini goldamaga gönükdirilendir.
Şeýle hem CILT-iň adyndan türkmenistanly uçurym Sabina Ibragimowa okuw meýilnamasyny tamamlandygy barada diplom berildi.
«Tegelek stol» tejribe alyşmak we logistika pudagynda zenanlaryň mundan beýläk-de ösmeginiň ýollaryny ara alyp maslahatlaşmak üçin ýerlik boldy. Oňa gatnaşanlar zenanlaryň işe çekilmegi tutuş senagatyň netijeliligini we durnuklylygyny ep-esli ýokarlandyryp biler diýen ynamly netijä geldiler.
