Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Türki döwletleriň guramasynyň Aksakgallar geňeşiniň başlygy Binaly Ýyldyrymyň çakylygy boýunça Aksakgallar geňeşiniň agzasy, şeýle hem hormatly myhman hökmünde Geňeşiň 16-njy mejlisine gatnaşmak maksady bilen, Wengriýa iş sapary bilen ugrady.
Paýtagtymyzyň Halkara howa menzilinde Gahryman Arkadagymyzy ýurdumyzyň resmi adamlary ugratdylar.
Türkmenistan oňyn Bitaraplyk we parahatçylyk söýüjilik ýörelgelerine esaslanýan daşary syýasy strategiýany durmuşa geçirmek bilen gyzyklanma bildirýän taraplaryň ählisi bilen, şol sanda abraýly halkara we sebit düzümleriniň çäklerinde netijeli gatnaşyklary ösdürmek ugruna berk eýerýär. Şunuň bilen baglylykda, türkmen halkynyň Milli Lideriniň Budapeşte şu gezekki sapary hem-de Türki döwletleriň guramasynyň Aksakgallar geňeşiniň nobatdaky mejlisine gatnaşmagy köpugurly gatnaşyklary pugtalandyrmagyň ýolunda möhüm ädimdir. Şol gatnaşyklar bolsa, hoşniýetli goňşuçylyk we birek-birege düşünmek hem-de Türki döwletleriň guramasy we oňa agza döwletler bilen netijeli hyzmatdaşlyk ýörelgelerine daýanýar.
Türkmenistanyň Wengriýa bilen ikitaraplaýyn gatnaşyklary barada aýdylanda bolsa, diplomatik gatnaşyklaryň ýola goýlan döwründen bäri birek-birege hormat goýmak esasynda guralýan döwletara hyzmatdaşlygyň yzygiderli pugtalandyrylýandygyny bellemek gerek. şunda ýokary we hökümet derejesindäki duşuşyklara aýratyn ähmiýet berilýär. Wengriýanyň Prezidentiniň 2011-nji ýylda Türkmenistana hem-de dostlukly ýurduň Premýer-ministriniň 2023-nji ýylda Aşgabada amala aşyran resmi saparlarynyň, şeýle hem Gahryman Arkadagymyz Gurbanguly Berdimuhamedowyň 2014-nji ýylda Wengriýa resmi saparynyň hem-de hormatly Prezidentimiz Serdar Berdimuhamedowyň 2023-nji ýylda Budapeşte amala aşyran iş saparynyň netijeleri munuň aýdyň subutnamasydyr.
Gahryman Arkadagymyzyň uçary Budapeşte çenli uçuşy amala aşyryp, dostlukly ýurduň paýtagtynyň Ferents List adyndaky halkara howa menziline gondy. Bu ýerde Türkmenistanyň Halk Maslahatynyň Başlygy Gurbanguly Berdimuhamedowy resmi adamlar garşyladylar.
