Hormatly Prezidentimiziň taryhy ähmiýetli çykyşlarynda ýerlikli belleýşi ýaly, berkarar Watanymyzy ählitaraplaýyn gülläp ösýän ýurda öwürmekde gazanylýan ýokary üstünliklere Diýarymyzyň zähmetsöýer telekeçileri özleriniň saldamly goşantlaryny goşýarlar.
Balkan welaýatynyň merkezi Balkanabat şäherinde 2020-nji ýylyň güýzünde işe girizilen döwrebap ýyladyşhana hem şeýle giň gerimli toplumlaýyn aladalaryň ajaýyp miweleriniň biridir. Uly Balkan dagynyň degresindäki mes toprakly Düzmergen ýaýlasynda bina edilen häzirki zaman ýyladyşhanasy Türkmenistanyň Senagatçylar we telekeçiler birleşmesiniň işjeň agzasy Halmämmet Amanmämmedowa degişlidir.
Berkarar döwletiň täze eýýamynyň Galkynyşy döwründe eziz il-ulsumyzyň eşretli, bolelin durmuşda ýaşamagy, raýatlarymyzyň öz topragymyzda ýetişdirilýän dürli ter gök önümler bilen ähli möwsümde ygtybarly üpjün edilmegi, şunda hususy pudagyň mümkinçiliginiň netijeli peýdalanylmagy babatda hormatly Prezidentimiziň edýän döwletli aladalaryna mynasyp goşant goşmak döwrebap ýyladyşhananyň eýesi bolan ussat telekeçiniň esasy maksady bolup durýar. Ýerli bagbanlardyr hünärmenleriň gazanýan önümçilik görkezijileri taryhy eýýamymyzda hususy pudagyň okgunly, depginli ösüşlere eýe bolýandygyny ýene bir gezek bütin aýdyňlygy bilen görkezýär.
Türkiýede, Gollandiýada öndürilen ösen enjamlar bilen birkemsiz üpjün edilen ýyladyşhanada işler kuwwatly tehnologiýalara, kämil işläp taýýarlamalara daýanýar. Şeýle-de ýyldyşhanadan tutuş möwsümiň dowamynda alynjak pomidor hasylynyň umumy möçberi 1 müň tonnadan geçer.
Bu ýerde ýylylyk, çyglylyk, suwaryş ulgamlarynyň işlerem kadaly ýola goýlupdyr. Ter gök önümleriň dürli görnüşlerini ösdürip ýetişdirmäge niýetlenilen, umumy tutýan meýdany bäş gektara barabar bolan ýyladyşhana iş orunlarynyň birbada altmyşa golaýyny döretmäge mümkinçilik berdi.
Bereketli ýyladyşhanada agrotehniki talaplara laýyk ýetişýän pomidorlary ýygnamak işleri «Pähim-paýhas ummany Magtymguly Pyragy» ýylynyň jemleýji aýynyň häzirki günlerinde hem guramaçylykly dowam etdirilip, içerki, daşarky bazarlaryň sarp edijilerine yzygiderli ýetirilýär. Munuň şeýledigine türkmen telekeçisiniň ýokary hil ülňülerine laýyk gelýän ekologiýa taýdan arassa, bäsdeşlige ukyply önümleriniň golaýda Russiýa Federasiýasyna ugradylyp başlanmagy hem aýdyň şaýatlyk edýär.
