Hormatly Prezidentimiz Serdar Berdimuhamedow Ministrler Kabinetiniň 9-njy dekabrda bolup geçen giňişleýin mejlisinde tamamlanýan ýylyň dowamynda Türkmenistanyň halkara hyzmatdaşlyk boýunça amal eden işiniň netijelerini jemlemek bilen, ýurdumyzda we daşary ýurtlarda türkmen halkynyň beýik ogly Magtymguly Pyragynyň doglan gününiň 300 ýyllygynyň giňden bellenendigini nygtap geçdi. Bu şanly sene mynasybetli daşary ýurtlarda, takmynan, 170 möhüm çäre guraldy.
Möhüm toý çäreleriniň biri-de 5-nji dekabrda A.W.Pawlowanyň «Dünýäniň akyldarlary. Türkmenistan.» atly awtorlyk taslamasynyň çäginde «Ata pendi» şygyr pýesasy boýunça alnan filmi görkezildi. Bu türkmen edebiýatynyň nusgawy şahyry we Gündogaryň akyldary Magtymguly Pyragynyň 300 ýyllygy mynasybetli taslamanyň awtorlarynyň şahsy başlangyjy bilen Magtymguly hakynda Russiýada döredilen ilkinji filmdir. GDA-nyň Ýerine ýetiriji komitetiniň we Moris Torez adyndaky Moskwa döwlet dil uniwersitetiniň goldawy bilen Türkmenistanyň Russiýa Federasiýasyndaky ilçihanasy tarapyndan guralan film görkezilişi uniwersitetiň mejlisler zalynda geçirildi.
Şahyryň kakasy Döwletmämmet Azadynyň Magtymgulynyň dünýägaraýşynyň we ruhy dünýäsiniň emele gelmegine eden täsiri baradaky şahyrana eseriň awtory Anastasiýa Walerýewna Pawlowa jemgyýetçilik işgäri, drama ýazyjysy, medeniýetşynas, «Dünýäniň akyldarlary» taslamasynyň ýazary, «Ynsanyň wagty» sosial-medeni başlangyjyň egindeş başlygydyr. Filmiň režissýory – RBK-nyň we TASS-yň öňki metbugat dolandyryjysy N.Geraşşenko, filmiň sazy – kompozitor T.Jageriňki.
Bu film taslamasynyň aýratynlygy onda birnäçe žanryň birleşdirilmegidir. Şahyrana pýesa, Magtymgulynyň goşgularynyň terjimeleriniň okalmagy, türkmen manzarlarynyň, I.D.Kobzon adyndaky Teatr sungaty institutynyň uçurymlarynyň gatnaşmagynda, ýagny Magtymgulynyň keşbinde Mark Margarýan, şahyryň kakasynyň keşbinde Andreý Iosifow, şahyryň söýgülisi Meňliniň keşbinde Ýelizaweta Prilutskaýanyň çykyş etmegi ýordumlaryň sahnalaşdyrylyşynyň resminamalaýyn wideo düşürilmegi ýaly özboluşly ýygnamyndadyr.
