Türkmenistanda Adam hukuklary boýunça ygtyýarly wekil – Adalatçy Ý.Gurbannazarowa BMG-niň Merkezi Aziýada adam hukuklary boýunça ýokary komissarynyň edarasynyň sebit wekili Matilda Bogner we Halkara Zähmet Guramasynyň bilermeni Miranda Faýerman bilen wideoduşuşyk geçirdi.

Taraplar Adalatçynyň diwanynyň tamamlanyp barýan ýylda amala aşyran işleriniň netijelerini we Türkmenistan hökümeti bilen Halkara Zähmet Guramasynyň arasyndaky 2024-2025-nji ýyllar üçin hyzmatdaşlygyň «Ýol kartasynyň» çäginde indiki ýyl üçin meýilleşdirilýän işiň ileri tutulýan ugurlaryny ara alyp maslahatlaşdylar. Duşuşygyň barşynda bu guramalar bilen hyzmatdaşlykda Adalatçynyň diwanynyň adam hukuklaryny goramak ugrundaky işinde oňyn netijeler gazanandygy bellendi.

Geljekde ilatyň adam hukuklary meseleleri baradaky düşünjesini artdyrmak, şeýle hem olaryň bozulmagynyň öňüni almak we bozulan hukuklary dikeltmek üçin has täsirli çäreleri geçirmek meýilleşdirilýär. Türkmenistanda Adam hukuklary boýunça ygtyýarly wekil – Adalatçy Ý.Gurbannazarowa ilatyň adam hukuklary barada habarlylygyny ýokarlandyrmagyň we bu ugurda halkara kärdeşler bilen has ýakyn hyzmatdaşlygyň zerurdygyny nygtady.

Duşuşygyň ahyrynda AHÝKE we HZG-niň wekilleri Adalatçynyň diwanynyň adam hukuklaryny öňe sürmekdäki üstünliklerini we bilelikdäki hyzmatdaşlygy has-da giňeltmegiň zerurdygyny bellediler.