Ýurdumyzyň esasy baýlyklarynyň biri bolan uglewodorod serişdelerini gözläp tapmak, senagat taýdan özleşdirmek, olaryň gazylyp alynýan möçberini artdyrmak, çig maly täzeden işlemek we sarp edijilere ýetirmek boýunça giň gerimli işler durmuşa geçirilýär.
Berkarar Diýarymyzda ileri tutulýan ugurlaryň biri bolan nebitgaz pudagynyň mundan bu ýana-da ösmegine, uglewodorod serişdelerinden alynýan, dünýä bazarlarynda islegli harytlaryň öndürilmegine uly goşant goşýan ýurdumyzyň iň iri kärhanalaryň biri-de Lebap welaýatynda ýerleşýän Seýdiniň nebiti gaýtadan işleýän zawodydyr. Geçen ýyllaryň dowamynda bu kuwwatly kärhanada möhüm taslamalaryň ençemesiniň amala aşyrylmagy, düýpli maýa goýum serişdeleriniň hasabyna durkunyň düýpli täzelenmegi bu ýerde önümçiligiň möçberiniň we hiliniň ep-esli ýokarlanmagyna ýardam etdi. Munuň şeýledigine bu ýerde öndürilýän dürli görnüşli ýokary hilli önümler, gazanylýan ýokary netijeler aýdyň şaýatlyk edýär.
Kärhanada 2024-nji ̶ «Pähim-paýhas ummany Magtymguly Pyragy» ýylynyň başyndan bäri çig mallaryň 431 müň 400 tonna töweregi täzeden işlenilip, bu baradaky göz öňünde tutulan meýilnama 109,1 göterim amal edildi. Bu görkezilen çig maldan bolsa, degişli döwürde kärhana tarapyndan jemi önümleriň 375,7 müň tonna golaýy öndürilipdir. Bu öndürilen önümiň 219 müň tonna golaýy dürli oktan belgili benziniň bolmagy we olaryň sarp edijilere ugradylmagy aýratyn bellenilmäge mynasypdyr. Bu gymmatly önümi öndürmek boýunça geçen ýylyň şu döwri bilen deňeşdirilende ösüş depgininiň 109,6 göterime deň bolmagy, bu kärhanada önümçiligiň barha kämilleşýändiginiň we işleriň guramaçylykly ýola goýlandygynyň aýdyň mysalydyr. Ýurdumyzyň halk hojalygynyň yzygiderli ösmeginde möhüm orna eýe bolan bu iri kärhanada şu ýylyň 11 aýynda dizel ýangyjynyň 109,6 müň, agyr wakuum gazoýlynyň 23,6 müň tonna golaýy, şeýle hem ýol bitumynyň 19 müň tonnadan gowragy öndürilipdir.
Şeýle ýokary netijeleriň gazanylmagy, kärhananyň häzirkizaman iň kämil enjamlar bilen üpjün edilmegi bilen birlikde, işgärleriň öndürijilikli zähmet çekmekleri we kadaly dynç almaklary üçin hormatly Prezidentimiz tarapyndan döredilip berilýän giň şertleriň netijeleridir.
