Aşgabat şäheriniň bedenterbiýe we sport baradaky Baş müdirliginiň Ýöriteleşdirilen küşt we şaşka mekdebinde geçirilen Türkmenistanyň baş baýragy ugrunda täze küşt ýaryşynyň birinji tapgyryna 130 küştçi gatnaşdy.

Türkmenistanyň Küşt federasiýasynyň täze ýaryşy ýurdumyzyň dürli künjegindäki küştçülere tejribe toplamak, ýokary liga çykmak üçin mümkinçiliklerini ýokarlandyrmak we ýurdumyzda küşt oýnuny giňden ýaýmak maksady bilen guraldy.

Täze ýaryş bäş welaýatyň we Türkmenistanyň paýtagtynyň küştçilerini birleşdirýän alty tapgyrdan ybaratdyr. Olaryň hersine gatnaşmak bilen küştçiler umumy hasap üçin möhüm utuklary toplarlar. Soňky tapgyr paýtagtda bolar. Onuň jemi boýunça açyk we zenanlar toparlaryň ýeňijileri 2026-njy ýylda Türkmenistanyň ýokary ligasyna göni gatnaşarlar, onda halkara ýaryşlaryna gatnaşmak üçin milli ýygyndynyň düzümi kesgitleniler.

Aşgabat tapgyrynda açyk toparda 86, zenanlar toparynda 44 küştçi iň güýçli oýunçy ady almak ugrunda göreşdi.

Soňky ýyllarda erkekler bilen bir hatarda zenanlaryň hem gatnaşmagyna rugsat berlen, bu ýagdaý hat-da höweslendirilýän açyk toparynda Türkmen döwlet bedenterbiýe we sport institutynyň talyby Amanmuhammet Hommadow (görkezijisi – 2251) ýeňiji boldy. Türkmenistanyň at gazanan tälimçisi Serdar Annaberdiýewiň zehinli bu okuwçysy 9 oýunda 7 ýeňiş gazanyp, 2-sini deň oýnap, 8 utuk toplady.

Dört küştçi ýeňijiden 1 utuk az toplady, olaryň ykbaly görkezijileri boýunça çözüldi. Netijede kümüş baýraga Ýagşygeldi Kakaýew adyndaky Halkara nebit we gaz uniwersitetiniň talyby Läle Şöhradowa (görkezijisi – 2137), bürünç medala bolsa Türkmenabat şäherindäki 31-nji orta mekdebiň okuwçysy Serdar Baýramow (görkezijisi – 1998) mynasyp boldy.

Zenanlar toparynda 2025-nji ýyl ýokary liganyň çempiony Jahan Rejebowa 6,5 utuk toplap, 7-nji ýeri eýeledi.

Zenanlar toparynda Aşgabat şäherindäki 17-nji orta mekdebiň 12-nji synp okuwçysy Eneş Arazmedowa (FIDE görkezijisi – 1811) ýeňiji boldy, ol geçen ýyl Türkmenistan milli ýygyndysynyň hatarynda Budapeştde geçirilen Bütindünýä küşt olimpiadasynda «C» kategoriýasynda altyn medal gazandy. Eneş Arazmedowa ýaryşy altynjy belgide başlandygyna garamazdan, has tejribeli garşydaşlaryndan öňe geçip, 7,5 utuk toplap, görkezijisini 96 bal ýokarlandyrdy. E.Arazmedowa Serdar Annaberdiýewiň ýolbaşçylygynda tälim alýar.

7 utuk bilen ikinji ýeri Türkmenabat şäherindäki 41-nji orta mekdebiň 11-nji synp okuwçysy Gülmira Seýilhanowa eýeledi (görkezijisi – 1926).

Dört küştçi birbada 6,5 utuk gazandy, ýöne goşmaça görkezijileri boýunça bürünç medal FIDE-niň ussady Bägül Ezizowa (görkezijisi –1939) berildi. Häzirki wagtda Bägül Ezizowa Serdar Annaberdiýewden tälim alýar.

Ýaşy uly garşydaşlary bilen güýçli bäsleşen ýaş küştçileriň oýnuny bellemek gerek. Kadetleriň arasynda Aýa Baýramowa (6-njy ýer, 6,5 utuk), Nurana Söýünowa (7-nji ýer, 6 utuk) we Dilber Hüpbiýewa (9-njy ýer, 6 utuk) tapawutlandylar. N.Söýünowa görkezijisini 126 bal ýokarlandyrdy.

Türkmenistanyň zenanlar milli ýygyndysynyň baş tälimçisi Şahruh Turaýew bu gyzlaryň geljekde halkara ýaryşlarynda çykyşlaryna uly umyt baglaýar.

Baş baýrak ugrunda küşt ýaryşynyň Aşgabat tapgyry «Küşt Älemi» küşt akademiýasynyň, «TurkmenExpo» kompaniýasynyň, «Belle» goşundysynyň we TKF-niň beýleki hyzmatdaşlarynyň goldawy bilen guraldy.

Üýtgeşik täzelikleriň biri – döwleriň göni ýaýlym arkaly görkezilmegi Türkmenistanda küşt oýnunda öňe gidişlik boldy. Synag hökmünde açyk toparyndan 7 tagtanyň we zenanlar toparyndan 3 tagtanyň oýunlary görkezildi. Bu ýörite küşt enjamlaryny öndüriji we öňdebaryjy «Imdat Elektronika» türkmen maglumat tehnologiýa kompaniýasy bilen Gollandiýanyň DGT kompaniýasy bilen hyzmatdaşlygyň netijesinde mümkin boldy.

Türkmenistanyň küşt ýaryşynyň baş baýragynyň indiki tapgyryny şu ýylyň maý aýynda Balkan welaýatynda geçirmek meýilleşdirilýär.