Berkarar döwletiň täze eýýamynyň Galkynyşy döwründe ýurdumyzyň kanunçylyk binýadyny kämilleşdirmek boýunça kabul edilýän kadalaşdyryjy hukuknamalar toplumlaýyn we yzygiderli häsiýete eýedigi bilen tapawutlanýar.
Il-ýurt bähbitli, döwlet ähmiýetli her bir işi, döwletli tutumlary ylmy we kanun esaslara daýanmak arkaly amala aşyrylýan ýurdumyzda ösüşleriň, zähmet ýeňişleriň sany barha artýar. «Ýaşaýyş jaýlaryň we gozgalmaýan emläge degişli başga obýektleriň paýly gurluşygy hakynda» Türkmenistanyň Kanuny hem Watanymyzyň dürli künjeklerinde amala aşyrylýan gurluşyk iş ýeriniň hukuk binýadyny emele getirýär. Ýurdumyzyň ähli sebitlerinde döwrebap amatlyklary bilen bina edilýän dürli maksatly desgalaryň hukuk ýörelgesini emele getirýän bu Kanun 2023-nji ýylyň 23-nji martynda döwrüň talaplaryna laýyklykda kämilleşdirildi.
Gahryman Arkadagymyzyň başlangyçlary esasynda 2012-nji ýylyň 31-nji martynda kabul edilen «Ýaşaýyş jaýlaryň we gozgalmaýan emläge degişli başga obýektleriň paýly gurluşygy hakynda» Türkmenistanyň Kanunynyň 3-nji maddasynda hem kesgitlenilişi ýaly, bu Kanunyň hereket edýän çygry paýçylar bilen gurujylaryň arasynda paýly gurluşyga gatnaşmagyň şertnamasy ýa-da paýly gurluşyk bilen baglanyşykly başga şertnamalaýyn borçnamalary esaslanýan gatnaşyklara degişlidir.
Bu Kanunyň 11-njy maddasynyň 1-nji bendinde: «Paýly gurluşyga gatnaşmagyň bir kysmy şertnamasyna laýyklykda, ýazmaça görnüşde baglaşylýan paýly gurluşyga gatnaşmagyň şertnamasy paýly gurluşygy amala aşyrmak üçin esas bolup durýar» diýlip bellenilýär. Bu maddanyň 2-nji bendinde bolsa paýly gurluşygyň obýekti öý bolup durýan paýly gurluşyga gatnaşmagyň şertnamasy boýunça paýçy bolup diňe Türkmenistanyň raýatynyň çykyş edip bilýändigi anyk görkezilýär. Kanunyň bu maddasynda: «Paýly gurluşygyň obýekti aýratyn durýan sosial – medeni, administratiw, durmuş, söwda we önümçilik maksatly obýektleriň aýratyn bölegi, şeýle hem köp öýli ýaşaýyş jaýynda duran sosial – medeni, administratiw, durmuş we söwda maksatly obýekt ýa-da onuň aýratyn bölegi bolup durýan paýly gurluşyga gatnaşmagyň şertnamasy boýunça paýçylar bolup, diňe ýuridik şahsy döretmezden, telekeçilik iş bilen meşgullanýan fiziki şahslar we Türkmenistanyň kanunçylygyna laýyklykda döredilen ýuridik şahslar çykyş edip bilýärler» diýlip bellenilendir.
