2025-nji ýylyň 28-nji martynda Türkmenistanyň Russiýa Federasiýasyndaky Ilçihanasy Russiýa Federasiýasynyň Daşary işler ministrliginiň Diplomatik akademiýasy bilen bilelikde “Halkara parahatçylyk we ynanyşmak ýyly, 2025 – hyzmatdaşlyk we özara düşünişmek üçin başlangyç” atly ylmy-amaly maslahaty gurady. Bu barada Türkmenistanyň DIM-niň web-saýtynda habar berilýär.

Çärä Türkmenistanyň Ilçihanasynyň, Diplomatik akademiýanyň, Russiýa Federasiýasynyň Daşary işler ministrliginiň, diplomatik korpusyň, ylym-bilim edaralarynyň, halkara guramalarynyň we köpçülikleýin habar beriş serişdeleriniň wekilleri gatnaşdylar.

Maslahatda häzirki döwürde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow tarapyndan yglan edilen “Dialog parahatçylygyň kepili” atly halkara gatnaşyklarynyň täze filosofiýasynyň ähmiýetiniň we zerurlygynyň artýandygy bellenildi.

Türkmenistanyň başlangyjynyň dünýä tertibiniň esasy ýörelgesi hökmünde parahatçylyk we ynanyşmak pikirini durmuşa geçirmegiň syýasy, ideologiki we amaly taraplaryny öz içine alýan bilelikdäki işe başlamaga ähli döwletlere çagyryş bolup durýandygy nygtaldy.

Maslahat Türkmenistanyň Prezidentiniň we türkmen halkynyň Milli Lideri, Türkmenistanyň Halk Maslahatynyň Başlygynyň kitaplarynyň sergisi bilen utgaşdy.

Çäräniň dowamynda türkmen-rus gatnaşyklarynyň ösüşiniň taryhyndaky möhüm pursatlary şöhlelendirýän, şeýle hem tomaşaçylary türkmen halkynyň milli-medeni aýratynlyklary we özboluşlylygy bilen tanyşdyrýan surat sergisi guraldy.