Kuala-Lumpurda Türkmenistanyň ykdysadyýetine daşary ýurt maýa goýumlaryny çekmek boýunça geçiriljek halkara foruma 42 ýurtdan 470 wekil gatnaşar.

«Mandarin Oriental Kuala-Lumpur» myhmanhanasynda Türkmenistanyň ykdysadyýetine daşary ýurt maýa goýumlaryny çekmek boýunça halkara forum üçin hasaba alyş başlandy.

Şol myhmanhanada forumyň öňýany kabul edişlik bolup, oňa döwlet edaralarynyň, işewür toparlaryň we halkara guramalaryň wekilleri gatnaşar. Resmi däl ýagdaýda geçiriljek duşuşygyň öňde duran gepleşikler we işewür gatnaşyklary berkitmek üçin möhüm başlangyç bolmagyna garaşylýar.

Forumyň resmi açylyşy 23-nji aprelde «Kuala-Lumpur Convention Centre» merkezinde bolar. Türkmenistanyň ykdysadyýetine daşary ýurt maýa goýumlaryny çekmek boýunça halkara forumda maýa goýum taslamalary bilen tanyşlyklar we möhüm şertnamalara gol çekmeklik meýilleşdirilipdir. Türkmenistan bilen halkara işdeşleriň arasyndaky hyzmatdaşlygyň esasy ugurlary hökmünde energetika, infrastruktura we logistika aýratyn üns berler.

Foruma biziň ýurdumyzdan Türkmenistanyň hökümet wekillerini, «Türkmengaz», «Türkmennebit» döwlet konsernleriniň, şeýle hem ýurdumyzyň Söwda-senagat palatasynyň ýolbaşçylaryny öz içine alýan ýokary derejeli wekiliýet gatnaşar.

Forum Türkmenistanyň maýa goýum mümkinçiligini artdyrmak we durnukly ösüş, sanlylaşdyrma, energiýa howpsuzlygy ýaly möhüm meseleler boýunça halkara gepleşikleri çuňlaşdyrmak üçin möhüm ýerlik hökmünde orun alýar.