Türkmenistanyň Medeniýet ministrliginiň Sergi zalynda Türkmenistanyň Konstitusiýasynyň we Döwlet baýdagynyň güni mynasybetli türkmen suratkeşleriniň eserleriniň sergisi açyldy.
Serginiň başynda Türkmenistanyň paýtagtyny we Arkadag şäherini şekillendirýän suratlar ýerleşdirilipdir. Iň gyzykly işleriň biri Sülgün Gurbandurdyýewanyň “Arkadag şäheri – abadanlyk şäheri” suratydyr. Surat iki sany ýarym töwerekden ybarat nyşan görnüşinde ýerine ýetirilipdir. Atly ýadygärlikler şäheriň häzirki zaman binagärliginiň ýerliginde şekillendirilýär. Nyşanyň parahatçylygyň nyşany bolan ak ganatly kepderileri, ýaşlaryň baş geýimi tahýany, pagta meýdanlaryny, bugdaý sümmüllerini we türkmen nagyşlaryny görüp bolýan jemleýji häsiýetine garamazdan, suratkeş reňkleriň utgaşmagyny berjaý edipdir.
Onuň ýanynda Aziza Öwezmyradowanyň “Aziýanyň merjeni sen, Aşgabat” atly suraty bar. Işde altyn konturly çyzyklary ulanmak bilen, goýy gök öwüşginli häzirki Aşgabadyň binagärligi şekillendirilýär. Megerem, surat gije, Aşgabadyň edil gündizki ýaly owadan bolýan wagtynda döredilipdir. Ýene bir surat uzak wagtlap ýatda galýar. Bu Baýramgeldi Geldiýewiň “Ak şäherim Aşgabat” suratydyr. Suratkeş eseri iki bölege bölýär. Olaryň birinde häzirki zaman Aşgabadyň gözel görnüşi, beýlekisinde bolsa çaýhananyň eýwany görkezilýär, eýwanda ak saçak bilen örtülen stol “Gelen – döwlet” diýip dur. Eýwany gurşap alan agaçlaryň ýapraklarynyň arasyndan stoluň üstüne tertipsiz tegelek görnüşinde köp sanly kölege düşýär. Bu iş görene rahatlyk bagyşlaýar.
Öwezmuhammet Mämmetnurow peýzažlaryň uly ýygyndysyny görkezdi. Onuň umumy ady “Dag eňňitlerinde” bolan iki işi aýratyn ünsi çekýärdi. Olar daşyň bolşuny görkezmek üçin, dürli reňkler ulanylyp, impressionizm usulynda çekilipdir.
Suratkeş Hamida Nabiýewa “Säher” suratyny görkezdi. Hamida üzüm ýygmak bilen başlanýan oba säherini suratlandyrypdyr. Agtyk atasynyň görkezmegi bilen, ýakut deý şireli miweleri kesip alýar. Realizm usulynda ýerine ýetirilen bu suratda her bir üzüm ýapragy takyklyk bilen şekillendirilipdir. Surat ýaşulynyň we onuň agtygynyň lezzet alýan keýpi bilen özüne çekýär.
“Säher” suratynyň ýerine ýetirilişi Toýly Çopanowyň “Bol hasyl” işini ýada salýar, onda ýaşuly üzüm doly guty bilen öýüne barýar. Bu surat hem sergide görkezilýär we gelenleri öz ýanynda ýene bir gezek saklanmaga mejbur edýär.
Mähriban Jumaýewa “Bagtly çagalyk” atly şowly çykan suratyny görkezdi. Ol tigir görnüşli uly sallançakda aýlanýan çagalary şekillendiripdir. Özi-de, Mähriban çagalary adaty bolmadyk dik garaýyşdan çekipdir, netijede gözýetime diňe çagaly dört öýjagaz düşüpdir. Kiçijik ýolagçylaryň paýtagtymyzyň eliň aýasynda ýaly görünýän ýerine çykanlarynda, başdan geçiren şatlygyny suratkeş gowy beýan edip bilipdir.
Türkmenistanyň Konstitusiýasynyň we Döwlet baýdagynyň gününe bagyşlanan sergi paýtagtyň muzeýlerinde we galereýalarynda bu mowzuk boýunça birnäçe sergini açýar.
