Türkmenistanyň Medeniýet ministrliginiň Şekillendiriş sungaty sergi merkezinde Türkmenistanyň halk suratkeşi Hajy Atakgaýewiň 80 ýaşynyň dolmagy mynasybetli şahsy sergisi geçirilýär. Nakgaş sergide 100-den gowrak işini goýupdyr, olaryň köpüsi haşam we çeper eserler üçin çekilen suratlardyr.
Serginiň merkezinde Hajy Atakgaýewiň öz ýakyn garyndaşy bilen düşen fotoetýudy ýerleşdirilipdir. Ünsüňi çekýän fotoetýud haşamçy Hajy Atakgaýewiň ajaýyp foto suratçydygyny hem aýdyň görkezýär. Onuň «At çapyşygy» atly işi sergä gelenlerde aýratyn gyzyklanma döretdi. Grafik suratda çapyp barýan dört atly şekillendirilen, özi-de olaryň hemmesi şekil sagdan çepe süýşürilip alnan. Oňa seredeniňde, häzirki zaman kompýuter grafikasy ulanylan ýaly duýgy döreýär. Gyzykly tarapy, «At çapyşygy» haşamy suratkeşiň diplom işi bolup, kompýuter grafikasynyň ýok wagty, 1960-njy ýyllarda döredilenligidir.
Sergide suratkeş Hajy Atakgaýewiň çagalara niýetlenen ençeme kitaby bezemek üçin çeken suratlary-da görkezilýär. Türkmenistanyň Suratkeşler birleşiginiň başlygy Çarymyrat Ýazmyradowyň sözlerine görä, 1990-njy ýyllaryň başynda Hajy Atakgaýew çagalara niýetlenen kitaplar üçin suratlary akwarel boýaglary bilen döredip, soň olar Türkiýede kompýuter tehnologiýasyna geçirilipdir. Şeýlelik bilen, Hajy Atakgaýew el işleri bilen kompýuter tehnologiýasyny utgaşdyrmak arkaly, täzelikçi hökmünde çykyş etdi.
Sergide goýlan uly haşam sergisi Magtymguly Pyraga bagyşlanýar. «Magtymgulynyň dünýäsi» atly bu bölüm suratkeşiň ajaýyp türkmen şahyrynyň ömri we döredijiligi baradaky filosofik oýlanmalaryny beýan edýär. Haşamlaryň iki usulda ýerine ýetirilendigini bellemek gerek: galam bilen we ofort tehnikasy bilen. Sergide Hajy Atakgaýewiň çeken suratlary hem bar. Suratkeş olary dürli görnüşde ýerine ýetiripdir, olardan «Kompozisiýa» we «Näziklik» awangard uslybynda, «Maşgala» bolsa realist uslybynda çekilipdir. «Maşgala» suratynda Hajy Atakgaýew öz maşgalasyny – özüni, aýalyny, iki ogluny we üç gyzyny suratlandyrypdyr. Häzirki wagtda Kanadada bolýan bir oglundan başga maşgala agzalarynyň ählisiniň maşgalabaşynyň şahsy sergisine gatnaşmagy bellenmäge mynasypdyr.
Suratkeşiň ogly Adyl Atakgaýew bize şeýle diýdi: – Men hünärim boýunça heýkeltaraş, özi-de bu käri 15 ýyl mugallymlarymdan, 30 ýyl hem kakamdan öwrendim.
Suratkeş Hajy Atakgaýewiň birmeňzeş pikirleriniň ýoklugyny, onuň ýordumlary gaýtalamazlygyny we ýygy-ýygydan usulyny üýtgedýändigini halaýaryn. Bu gün biz onuň 80 ýaşyny belleýäris, ýöne ol hemişe-de daş-töweregindäki dünýä garaýşy bilen tapawutlanýardy, bu gymmatly häsiýetini şu güne çenli-de saklap galypdyr.
Şahsy sergi ol ýere gelenleriň ählisine, şol sanda suratkeşiň köp sanly döredijilik kärdeşlerine-de uly lezzet berdi. Dostlary we kärdeşleri Hajy Atakgaýewi ýaş toýy bilen gutladylar, oňa berk jan saglyk we dowamly döredijilik üstünliklerini arzuw etdiler.
