Türkmenistanyň hemişelik Bitaraplygynyň 30 ýyllygyna bagyşlanan dabaralar mynasybetli Türkmenistanyň Döwlet çeperçilik akademiýasynda bu şöhratly senä bagyşlanan talyplaryň eserleriniň sergisi açyldy.
Akademiýanyň galereýasy ýaş zehinleriň döredijiligine ýene bir gezek seredip lezzet almak üçin gelen talyplar, suratkeşler we şekillendiriş sungatyny söýüjiler bilen doldy. Talyplar her wagtky ýaly, uly möçberde ajaýyp eserlerini görkezdiler. Olaryň arasynda Merdan Çaryýewiň «Maşgala mukaddesligi» atly eseri aýratyn ünsi özüne çekdi. Awtor bu temany zenany we erkek kişini aýyň, ýyldyzlaryň hem-de erkeklik we zenanlyk başlangyçlaryny tebigatyň özi bilen birleşdirýän towlanyp duran çyzyklaryň gurşawynda suratlandyryp, abstrakt görnüşde açyp görkezdi.
Şöhrat Amangulyýewiň «Ejemiň nahary barada ýatlamasy» atly işi gyzyklydyr. Zolakly saçagyň merkezinde unaşly tabak, onuň gyralarynda bolsa ýaşyl sogan, sarymsak, çörek we çaýly käse ýerleşdirilipdir. Ýerlikli saýlanan reňkler we bu adaty zatlar mukaddeslik äheňini döredýär. Ýokardan we ýakyn aralykdan düşürilen görnüş muňa ýardam edýär.
Biziň pikirimize görä, Göwher Öwezowanyň durmuş temasyna ýazylan «Mekdebe ugraýarka» atly eseri örän gowydyr. Göwher aýnada öz keşbine ünsli seredýän mekdep okuwçysyny suratlandyrypdyr. Pişik bolsa, eýesine öýkünip, öz keşbine seredýär, edil özüniň gowy görünýändigini barlaýan ýaly. Bu eseriň degişmesi we özüne çekijiligi tomaşaçylaryň ünsünden düşmedi.
Heýkeltaraşlar iň gowy eserlerini hödürlediler. Güljahan Şöhratgeldiýewa Gurbannazar Ezizowyň heýkeliniň awtorydyr. Güljahan heýkeliň üstüni altyn reňkli boýag bilen örtüp, şahyr bilen öz gatnaşygyny nygtapdyr. Serdar Jumaýew gipsden ýasalan ajaýyp toparlaýyn portreti görkezdi. Olaryň birinde Türkmenistanyň halk artisti Atajan Berdiýew, ikinjisinde bolsa Serdar özüni şekillendiripdir. Serdar diňe bir ajaýyp heýkeltaraş däl, eýsem, görnükli aýdymçydyr, Atajan Berdiýew bolsa onuň halypasydyr.
Serginiň iň haýran galdyryjy gymmatlyklaryň awtory Maksat Abdyýewdir. Ol diwarlaryny aýnalar bilen örtüp, guýyny emele getiripdir. Elektrik yşygynyň astynda guýynyň düýpsüzlik illýuziýasy döredilýär, şonuň üçin Maksat öz eserine «Çäksizlik» diýip at berdi.
Zergärleriň işleriniň sergisi göni manysynda ýalpyldaýardy. Amansähet Annaberdiýewiň okuwçysy Suraý Saparowa ajaýyp zenan keşbindäki «Gelin» atly owadan monjugy döredip, ony altyn keşdeler we gymmatbaha daşlar bilen bezedi. Ýakub Annaberdiýew «Tumarşa» atly monjukda türkmen halkynyň rowaýaty gahrymanynyň keşbini janlandyrdy. Ýakup öz eserinde eýesine maşgala bagtyny kepillendirýän mukaddes şaý-sepi tumary ulandy. «Gelin» we «Tumarşa» monjuklarynyň ikisi-de örän owadan.
Talyplaryň lybas bezegleriniň işleri ýyl-ýyldan Aşgabatlylaryň we paýtagtymyzyň myhmanlarynyň uly gyzyklanmasyny döredýär. Sergä gelen käbir myhmanlaryň talyplaryň moda toplumyny görmek üçin ýörite gelendikleri bellenmäge mynasypdyr. Altynjy ýyl talyby Seýrangeldi Berdiýew «SB» nyşanly moda lybaslar toplumyny görkezdi. Lybaslaryň dizaýneri hünäri Seýrangeldi üçin ikinji hünärdir. Ol akademiýanyň «heýkeltaraşlyk» bölüminde okaýarka, şol bir wagtda 4-nji başlangyç hünär okuw mekdebi tamamlady. Moda zenan lybaslaryny döretmäge oňa Hytaýyň «Onuň şahsy durmuşy» atly filmi ylham berdi. Seýrangeldi, hünärleriň şeýle utgaşmasynyň ikisine-de peýda getirjekdigine ynanýar.
Bäşinji ýyl talyby Jennet Agaýewa zenan lybaslarynyň «Gujurly ýaşlar» atly uly lybaslar toplumyny hödürledi. Bu lybaslar toplymy bilen Jennetiň ýaňy-ýakynda Sankt-Peterburgda bolan moda sergisinden gelendigi, onda häzirki zaman türkmen modasyny görkezendigi bellenmäge mynasypdyr. Jennete mahsus aýratynlyklaryň biri asimmetriýadyr, şonuň üçin onuň döreden zenan lybaslarynyň nusgalary diňe bir owadan däl, eýsem, özboluşlydyr. Ýurdumyzyň hemişelik Bitaraplygynyň 30 ýyllygyna bagyşlanan sergi şekillendiriş sungatyny söýüjilere ýaş suratkeşleriň eserleri bilen köp sanly täsirli duşuşyklary peşgeş berdi.
