ÝHHG-niň Aşgabatdaky merkezinde media sowatlylygy boýunça milli tälimçileriň utgaşdyryjy duşuşygy geçirildi. Ol bu ugurda hünärmenleri taýýarlamak boýunça taslamanyň durmuşa geçirilişine aralyk baha bermäge bagyşlandy.
Duşuşygyň esasy maksady toplanan tejribäni ara alyp maslahatlaşmakdan, gazanylan netijeleri seljermekden we Türkmenistanda maglumat sowatlylygyny has-da kämilleşdirmek üçin geljekki strategiýany işläp düzmekden ybarat boldy. Sanly ulgam arkaly geçirilen çärä Gazagystandan bilermen-geňeşçiler Duman Smakow we Adil Jalilow goşuldylar, olar taslamanyň dowamynda maslahatçy hökmünde çykyş etdiler. Duşuşygyň utgaşdyryjylyk işlerini ÝHHG-niň jemgyýetçilik maglumaty boýunça merkeziniň işgäri Swetlana Ostrouşenko amala aşyrdy.
2025-nji ýylyň iýul-dekabry aýlary aralygynda milli tälimçiler tarapyndan dört sany doly derejeli okuw maslahaty geçirildi. Olara dürli toparlaryň wekilleri: žurnalistler, talyplar, döwlet edaralarynyň işgärleri we blogerlik ulgamynyň hünärmenleri gatnaşdylar. Okuwlaryň mowzuklary metbugat we maglumat sowatlylygy babatda halkara hem-de milli hukuk kadalaşdyryşynyň möhüm ugurlaryny, şeýle hem maglumatlary barlamak we emeli aň bilen işlemek boýunça amaly gollanmalary öz içine aldy.
Taslama jemi dokuz tälimçi gatnaşyp, ýene-de on hünärmen ýakyn wagtda özbaşdak okuwlary geçirmegi meýilleşdirýär. Geçirilen soragnamalaryň netijeleri boýunça gatnaşyjylar ykjam žurnalistikasy, emeli aňyň ulanylyşy, köpçüligiň öňünde çykyş etmek we maglumatlary barlamak endiklerini ösdürmek ýaly mowzuklaryň örän peýdaly bolandygyny bellediler.
Tälimçiler öz tejribeleri barada gürrüň berip, diňleýjileriň metbugat sowatlylygy meselelerine bolan gyzyklanmasynyň barha artýandygyny, şeýle hem ýokary netijeleri gazanmak üçin okuwlara düýpli taýýarlyk görmegiň ähmiýetini nygtadylar.
2026-njy ýyl üçin meýilnamada Türkmenistanyň diňleýjileriniň aýratynlyklaryna laýyklykda uýgunlaşdyryljak metbugat sowatlylygy boýunça okuwlaryň nusgawy modulyny işläp düzmek göz öňünde tutulýar. Şeýle hem, maksatnamanyň gerimini giňeltmek we ilatyň maglumat medeniýetini ýokarlandyrmak maksady bilen, ýurdumyzyň iki welaýatynda okuw maslahatlaryny geçirmek meýilleşdirilýär.
