2026-njy ýylyň 16-njy fewralynda «Ýyldyz» myhmanhanasynda Türkmenistanyň Hökümeti bilen BSGG-niň guramagynda Ählumumy saglygy goraýyşda diplomatiýa meseleleri boýunça ýokary derejedäki Dialogyň açylyş dabarasy geçirildi. Forum köpçülikleýin howpsuzlyk we saglygy goraýyş ulgamynyň durnukly ösüşi meselelerinde ýurtlaryň tagallalaryny utgaşdyrmak üçin bitewi platformany döretmegi maksat edinýär. Bu barada Türkmenistanyň DIM-niň web-saýtynda habar berilýär. 

Çärede Türkmenistanyň döwlet edaralarynyň, Birleşen Milletler Guramasynyň, Bütindünýä Saglygy Goraýyş Guramasynyň, Garaşsyz Döwletler Arkalaşygynyň ýolbaşçylary we wekilleri, şeýle-de Merkezi Aziýa ýurtlarynyň we Ermenistanyň degişli edaralarynyň wekilleri çykyş etdiler. Çykyşlarda esasy üns köpçülikleýin howpsuzlyk, saglygy goraýşyň ösmegi, tejribe alyşmak we lukmançylyk ulgamynda hünärmenleri taýýarlamak meselelerine gönükdirildi.

Çärede çykyş etmek bilen Türkmenistanyň Daşary işler ministriniň orunbasary M.Bäşimowa Dialogyň ýurt üçin aýratyn döwürde – Arkalaşykda saglyk ýyly diýlip yglan edilen Türkmenistanyň GDA-da başlyklyk edýän ýylynda geçirilýändigini nygtady. Bu bolsa, durnukly ösüşiň, sosial durnuklylygyň we döwletleriň arasyndaky ynanyşmagyň esasy hökmünde jemgyýetçilik saglygyny pugtalandyrmagyň Türkmenistanyň strategik ileri tutýan ugrydygyny görkezýär.

Şeýle hem gatnaşyjylar sebitleýin dialogyň Aşgabatda geçirilmeginiň simwoliki ähmiýetini belläp, Türkmenistanyň Merkezi Aziýa ýurtlarynyň arasyndaky hyzmatdaşlygy we sebitiň saglygy goraýyş ulgamyny ösdürmek babatda BSGG bilen işjeň gatnaşygy yzygiderli goldaýandygyny nygtadylar.

Pikir alyşmalaryň dowamynda bu formatyň GDA ýurtlarynyň, BSGG-niň Ýewropa sebitiniň we beýleki halkara hyzmatdaşlaryň arasynda ynamy döretmek, tejribe alyşmak we täze hyzmatdaşlygy ösdürmek üçin özboluşly platforma döretjekdigi bellenildi.