Daşoguz welaýatynyň Nurmuhammet Andalyp adyndaky döwlet sazly drama teatry tarapyndan «Garaşsyz, baky Bitarap Türkmenistan – bedew batly at-myradyň mekany» diýen ýylyň şygaryna bagyşlanan «Seýis» atly täze sahna oýnuny taýýarlaýar.

Döredijilik topary Merdan Çarymuhammedowyň döredijiligi esasynda drama eseriň okalyşyna ýaňy girişen hem bolsa, teatryň ähli işgärleri işe gyzgalaňly girişdiler. Sahna we saz bezegleri taýýarlanylýar, şeýle-de tikinçilik bölümi yhlasly işleýär.

Täze sahna oýny seýisçilik sungatynyň gadymy däp-dessurlaryna çuňňur aralaşmagy wada berýär. Tomaşaçylara nesilleriň dowamatlylygy, ussat seýisleriň ýaş bedewlere ideg edişi we halkymyzyň buýsanjy hem-de gymmatly hazynasy bolan ahalteke bedewlerine nähili tälim berýändigi görkeziler.

Bu eserde seýis we onuň atyny satyn almak isleýän han barada gürrüň berilýär. Seýis atyny satmak islemeýär we şeýle jogap berýär: «Sen meniň janymy satyn alyp bilersiň, ýöne ruhumy satyn alyp bilmersiň. Ol haryt däl, ol meniň doganym!». Netijede, han aty ogurlaýar. Aradan ençeme ýyl geçenden soň, gahryman öz wepaly dostuny uzak illerden tapýar.

Seýis aty bilen gürleşip, ondan öýüniň, dogduk mekanynyň, maşgalasynyň we ýaryşlarynyň ýadyna düşýändigini soraýar. Şol wagt aty yzyna alyp gaýtmak başartmaýar we eýesi gynanyp, öýüne gaýdýar. Emma bir gün atyň özi öýüniň ýoluny tapyp dolanyp gelmegi sahna eseriniň iň täsirli pursatlarynyň birine öwrülýär.

– Biz sahna oýnunyň ilkinji görkezilişini Türkmen bedewiniň milli baýramyna taýýarlaýarys – diýip, režissýor Guwanç Baýmedow aýdýar. – Ertekiler dünýäsine kybapdaş ruhdaky bu sahna eserinde ýagtylyk we kölegeler bilen oýnamak, aýdym-sazyň utgaşygy ýaly täsirli pursatlar bolar. Şeýle-de bu spektakl däp-dessurlara, filosofiki pikirlere we nakyllara baý bolar. Olaryň birinde şeýle diýilýär «Ertir tur-da ataňy gör, ataňdan soň – atyňy». Bu paýhasa eýerip, atyň türkmen üçin nähili möhümdigini – onuň türkmeniň janydygyna düşünýärsiň.

Bu sahna oýnunda Türkmenistanyň at gazanan sahna ussatlary we Türkmenistanyň halk artistleri bilen bir hatarda zehinli ýaşlar hem çykyş edýärler. Seýsiň keşbini ýaş aktýor Begli Dowlyýew janlandyrýar. Sahna bezeglerine bolsa Çingiz Töräýew jogap berýär.

Şu ýyl ganatly bedewlerimize bagyşlanan köp sanly ajaýyp medeni çäreleriň geçirilmegine garaşylýar. Ýurdumyzyň ýaşaýjylary we myhmanlary türkmen halkynyň milli gymmatlyklaryny we ruhy däplerini görkezýän täze sahna oýnunyň ilkinji görkezilişine hem-de dabaralara uly gyzyklanma bilen garaşýarlar.