Berkarar döwletiň täze eýýamynyň Galkynyşy döwründe milli medeniýetimizi we sungatymyzy ösdürmek, ony döwrebap derejede kämilleşdirmek, bu ugra zehinli ýaşlary giňden çekmek maksady bilen, eziz Diýarymyzda çäksiz möçberli täsirli çäreler durmuşa geçirilýär. Munuň özi, ýaş nesliň kalbynda halkymyzyň köklerini gadymyýetiň jümmüşinden alyp gaýdýan aýdym-saz sungatyna bolan höweslerini, söýgi-buýsançlaryny has-da artdyrýar.
Balkan welaýatynyň merkezi Balkanabat şäherindäki Beýik Saparmyrat Türkmenbaşy adyndaky Balkan welaýat döwlet drama teatrynda guralan «Çalsana, bagşy!» bäsleşiginiň welaýat derejesindäki jemleýji tapgyry onuň aýdyň güwäsine öwrüldi. Ýurdumyzyň mukaddes Garaşsyzlygynyň şöhratly 35 ýyllyk baýramyna bagyşlanyp, Türkmenistanyň Prezidentiniň «Türkmeniň Altyn asyry» atly bäsleşiginiň çäklerinde geçirilýän bäsleşik aýdym-saz muşdaklary üçin ýakymly pursatlary peşgeş berdi. Şonuň ýaly-da bäsleşigiň dowamynda welaýatyň şäherleridir etraplarynda deslapky tapgyrlarda öňe saýlanan ýaş bagşylaryň, sazandalaryň çeper döredijilik ussatlygy gözden geçirildi.
«Garaşsyz, baky Bitarap Türkmenistan – bedew batly at-myradyň mekany» ýylynyň ajaýyp dabaralarynyň, şanly wakalarynyň üstüni ýetiren özboluşly sungat baýramçylygy onuň ähmiýetini hasam artdyrdy. Şeýle-de türkmen halkynyň Milli Lideri Gahryman Arkadagymyzyň hem-de Arkadagly Gahryman Serdarymyzyň medeniýet we sungat ulgamyny nusgalyk derejede ösdürmek hakyndaky irginsiz tagallalaryndan ruhlanan zehinli ýaş bagşy-sazandalar bäsleşige has taýýarlykly gelendiklerini subut etdiler. Olar halk aýdym-sazlaryny, mukamçy kompozitorlaryň döreden eserlerini ýerine ýetirip, tomaşaçylaryň, talapkär emin agzalarynyň öňünde özleriniň döredijilik ukyplaryny, zehinlerini açyp görkezdiler. Hoş owazlara beslenen çykyşlaryň ählisi tomaşaçylar tarapyndan şowhunly, dowamly el çarpyşmalar bilen alkyşlanyldy. Ýaşlaryň ýerine ýetirijilik ussatlygy, sahna medeniýeti, milliligi, çeperçilik derejesi talapkär emin agzalarynyň adalatly bahalarynda esasy orun tutdy.
Netijede, bäsleşigiň jemleýji tapgyry tolgundyryjy, täsirli pursatlara baýlygy bilen tapawutlandy. Şeýlelikde, bäsleşige gatnaşan 18 – 35 ýaş aralygyndaky bagşylar, sazandalar onuň şertlerine laýyklykda, iki bagşy we iki sazanda ýeňijiler diýlip ykrar edildiler. Has takygy, ýaş bagşylardan Maýa Kulyýewa adyndaky Türkmen milli konserwatoriýasynyň halk sazy fakultetiniň bagşy hünäriniň 2-nji ýyl talyby Güýçberdi Gulow, ýene-de şu ady agzalan konserwatoriýanyň halk sazy fakultetiniň bagşy hünäriniň 5-nji ýyl talyby Güljemal Çakanowa, ýaş sazandalardan Maýa Kulyýewa adyndaky Türkmen milli konserwatoriýasynyň halk sazy fakultetiniň türkmen halk sazy hünäriniň 3-nji ýyl talyby Öwezgeldi Gutlyýew, Balkan welaýat ýörite sungat mekdebiniň türkmen milli saz gurallary bölüminiň 4-nji ýyl talyby Gülöwser Nurtaganowa ýeňiji bolup, olar «Çalsana, bagşy!» bäsleşiginiň döwlet tapgyryna gatnaşmaga hukuk gazandylar.
Bäsleşigiň ahyry-da ýatdan çykmajak ýakymly, tolgundyryjy pursatlara beslenip, ýeňijilere Hormat hatlarydyr ýörite sowgatlar dabaraly ýagdaýda gowşuryldy.
