31-nji oktýabrda Belgiýa Patyşalygynyň Brýussel şäherinde «Merkezi Aziýa – Ýewropa Bileleşigi: üýtgeýän dünýäde hyzmatdaşlygyň özgerişi» atly strategik institutlaryň ilkinji forumy geçirildi.

Bu çäre Ýewropa Bileleşiginiň Merkezi Aziýa boýunça Ýörite wekiliniň edarasynyň hem-de Ýewropa Bileleşiginiň Howpsuzlyk meselelerini öwreniş institutynyň ýardam bermeginde guraldy.

Foruma Türkmenistanyň Daşary işler ministrliginiň geňeşçisi Batyr Niýazliýew we ilçi Sapar Pälwanow gatnaşdylar. Duşuşygyň esasy maksady Merkezi Aziýa bilen Ýewropa Bileleşiginiň arasynda bilermenler derejesindäki dialogy pugtalandyrmak we 2025-nji ýylyň aprelinde Samarkant şäherinde geçirilen «Merkezi Aziýa – Ýewropa Bileleşigi» ilkinji sammitiniň netijeleri boýunça strategik hyzmatdaşlygy mundan beýläk-de ösdürmek üçin anyk teklipleri işläp taýýarlamakdan ybarat boldy.

Forumyň dowamynda halkara howpsuzlygy, söwda-ykdysady hyzmatdaşlyk, ulag we energetika arabaglanyşygy, maýa goýumlaryny çekmek, sanlylaşdyrmak, bilim we jemgyýetçilik diplomatiýasy ýaly ugurlar boýunça pikir alşyldy.

Ara alyp maslahatlaşmalarda Hazarüsti halkara ulag geçelgesini ösdürmäge, söwda gatnaşyklaryny giňeltmäge we bilelikdäki maýa goýum taslamalaryny durmuşa geçirmäge aýratyn üns berildi. Türkmen tarapy energetika hyzmatdaşlygynyň, şol sanda türkmen tebigy gazyny Ýewropa bazaryna ibermek mümkinçilikleriniň, şeýle-de Türkmenistanyň ulag-logistika mümkinçilikleriniň we Türkmenbaşy Halkara deňiz portunyň ähmiýetini nygtady. Şeýle-de Türkmenistanyň 2027-nji ýylda «Merkezi Aziýa – Ýewropa Bileleşigi» Ykdysady forumyny geçirmek baradaky başlangyjynyň ähmiýeti bellenildi.

Forumyň aýratyn mejlisinde medeni we ynsanperwer hyzmatdaşlyk meselelerine garaldy. Forumyň jemleri boýunça gatnaşyjylar bilermenler dialogyny yzygiderli dowam etdirmegiň, bilelikdäki ylmy-barlag işlerini geçirmegiň we Merkezi Aziýa bilen Ýewropa Bileleşiginiň arasyndaky hyzmatdaşlygy mundan beýläk-de ösdürmegiň möhümdigini bellediler.