Türkmen ýokary okuw mekdepleriniň mugallymlary Özbegistan Respublikasynyň Daşkent şäherinde iňlis dili mugallymlaryny taýýarlamak maksatnamasy (PRESETT) boýunça geçirilen sebitleýin okuw maslahatyna gatnaşdylar.
Okuw maslahaty Britan geňeşiniň Merkezi Aziýada iňlis dilini öwretmegiň hilini ýokarlandyrmak boýunça bilim taslamasynyň (AELLCA) çäklerinde guralyp, mugallymlary taýýarlamagy kämilleşdirmäge, halkara tejribäni öwrenmäge we bilim ulgamynda sebit hyzmatdaşlygyny ösdürmäge gönükdirilendir.
Türkmen wekiliýetiniň düzümine Magtymguly adyndaky Türkmen döwlet uniwersitetiniň, Döwletmämmet Azady adyndaky Türkmen milli dünýä dilleri institutynyň we Seýitnazar Seýdi adyndaky Türkmen döwlet mugallymçylyk institutynyň mugallymlary girdiler.
Umuman, çäre Gazagystandan, Gyrgyzystandan, Täjigistandan, Türkmenistandan we Özbegistandan PRESETT maksatnamasy boýunça 30 sany milli geňeşçileri bir ýere jemledi.
Okuw maslahatyň dowamynda oňa gatnaşyjy ýurtlaryň ýokary okuw mekdepleriniň wekilleri Britan geňeşiniň baş direktory Skott Makdonald bilen duşuşdylar hem-de öz ýokary okuw mekdeplerinde işläp taýýarlan okuw maksatnamalarynyň taslamalaryny tanyşdyrdylar. Duşuşyk Abdulla Awloni adyndaky Milli pedagogika ussatlygy institutynda geçirildi.
AELLCA taslamasynyň çäklerinde bäş ýurduň milli geňeşçileri iňlis dili mugallymlaryny taýýarlamak maksatnamalaryny döwrebaplaşdyrmagyň üstünde işlediler. Maslahata gatnaşyjylar mugallymlaryň hünär taýdan yzygiderli ösmekleriniň (CPD), geljekki mugallymlary taýýarlamagyň ähli tapgyrlarynda beýan ediş (refleksiw) we ählitaraplaýyn (inklýuziw) çemeleşmeleri ornaşdyrmagyň ähmiýetini, mugallymlaryň başarnyklaryna baha bermegiň netijeli usullaryny hem-de milli hünärmenleriň bu işdäki ornuny ara alyp maslahatlaşdylar.
Duşuşygyň ahyrynda oňa gatnaşyjylar öz ýokary okuw mekdeplerinde bu ugurda alnyp barylýan işler we AELLCA taslamasynyň geljekki iňlis dili mugallymlaryny milli derejede taýýarlamak ulgamyny (PRESETT) özgertmäge ýetirýän täsiri barada gysgaça gürrüň berdiler.
Bellenilişi ýaly, AELLCA taslamasynyň çäklerinde Döwletmämmet Azady adyndaky Türkmen milli dünýä dilleri institutynda 2026 – 2027-nji okuw ýylyndan başlap, bilim beriş işine ornaşdyrylan täze okuw maksatnamasy işlenip taýýarlanyldy. Ol geljekki mugallymlaryň amaly taýýarlygyna gönükdirilendir we okuw netijeleriniň täzelenmegini, usuly bölegi güýçlendirmegi hem-de inklýuziw bilimiň ýörelgelerini nazara almagy göz öňünde tutýar.
Şeýle hem, mugallymlary taýýarlamak boýunça işleriň öňe ilerlemegine AELLCA-nyň hyzmatdaşlarynyň – Türkmenistanyň ýokary okuw mekdeplerinde milli geňeşçileriň hünärini ýokarlandyrmak boýunça okuw çärelerini geçirýän Norwiç dil bilimi institutynyň (Norwich Institute for Language Education, NILE) hünärmenleriniň gatnaşmagynyň köp babatda ýardam berýändigi bellenildi.
