...«Üns beriň, Moskwadan alyp eşitdirýäris we görkezýäris, Gyzyl meýdançany diňläň we oňa serediň. 1941-1945-nji ýyllaryň Beýik Watançylyk urşunda gazanylanÝeňiş mynasybetli dabaraly Ýeňiş ýörişi geçirilýär!» - diýen ses Gyzyl meýdançanyň depesinde ýaňlandy. Faşizmden gazanylan ýeňiş mynasybetli geçirilýän dabalary ýörüşleriň ählisi şu sözler bilen başlanýar» - diýlip TASS-yň habarynda bellenilýär.
Habarda aýdylşyna görä, dabaraly ýörişiň taryhy bölümini baýdakly toparlar açdylar, olar münberleriň öňünden frontlaryň 10-synyň baýdaklaryny göterip geçdiler. Soňra meýdançada pyýada goşun esgerleriniň, uçarmanlaryň, harby-deňiz gullukçylarynyň, inženerleriň, aňtawçylaryň, serhetçileriň harby lybasyny geýen harby gullukçylar peýda bolýar, meýletin goşunyň we maddy-tehniki taýdan üpjünçilik bölümleriniň gullukçylary geçip gitdiler. Olaryň ellerinde Beýik Watançylyk urşy döwrüniň ýaraglary – Simonowyň awtomatik oklanýan karabini, Mosiniň tüpeňi, Şpaginiň pistolet-pulemýoty (PPŞ) we Sudaýewiň pistolet-pulemýoty (PPS) ... bardy.
Dabaraly ýörişi RF-iň goranmak ministri Sergeý Şoýgu kabul etdi, dabaraly ýörişi Guryýer goşunlarynyň baş serkerdebaşysy Oleg Salýukow dolandyrdy. Dabaraly Ýeňiş ýörişine harby gullukçylaryň jemi 14 müňe golaýy gatnaşdy.
Münberleriň öňünden dünýä goşunlarynyň 13-siniň – Azerbaýjanyň, Ermenistanyň, Belorussiýanyň, Hindistanyň, Gazagystanyň, Gyrgyzystanyň, Hytaýyň, Moldawiýanyň, Mongoliýanyň, Serbiýanyň, Täjigistanyň, Türkmenistanyň we Özbegistanyň harby bölümleri geçdiler.
«Türkmenistanyň baýdaklary we hatarynda Türkmenistanyň Prezidenti Gurbanguly Berdimuhamedowyň atasy Berdimuhamet Annaýew söweşlere gatnaşan 2-nji Ukrain frontunyň 206-njy diwiziýasynyň 748-nji atyjylyk polkunyň baýdagy dakylan «Победа» kabriolet kysymly maşynlaryň ikisi dabaraly ýörişde şu ýurduň ýöriş bölüminiň başyny çekdi.
Taryhy söweş baýdagyny şu ýylyň 9-njy maýynda RF-iň goranmak ministriniň orunbasary general-polkownik Aleksandr Fomin Aşgabada sapary wagty Türkmenistanyň Prezidentine gowşurypdy» - diýip TASS habar berýär.
Beýik Ýeňşiň 75 ýyllygy mynasybetli Moskwada geçirilen dabaralarda Türkmenistanyň Hökümet wekilýetine ýurduň goranmak ministri, general-maýor Begenç Gündogdyýew ýolbaşçylyk etdi.
«Milli goşunyň esgerleriniň we serkerdeleriniň dabaraly ýörişe gatnaşmagy her bir türkmenistanlynyň kalbynda Beýik Ýeňşiň gazanylmagyna mynasyp goşant goşan türkmen topragynyň gerçek ogullarynyň gaýduwsyzlygyna hem-de gahrymançylygyna bolan buýsanç duýgusyny döredýär. Biz bu şöhratly senäni bellemek bilen, geljekki nesilleriň parahat durmuşynyň hatyrasyna gazaply söweş meýdanlarynda deňsiz-taýsyz edermenlik görkezen gahrymanlarymyzy uly hormat-sarpa duýgusy bilen ýatlaýarys» - diýip Türkmenistanyň Prezidenti Gurbanguly Berdimuhamedow Hökümetiň 19-njy iýunda geçirilen mejlisinde nygtady.
