Türkmen tarapyndan onlaýn-gepleşiklere DIM-niň, Sport we ýaşlar syýasaty ministrliginiň, Milli olimpiýa komitetiniň wekilleri gatnaşdylar.
UCI-niň prezidenti Dawid Lappertýen bilen onlaýn-duşuşygyň çäklerinde 2021-nji ýylda Aşgabatda Welotrek boýunça dünýä çempionatyny geçirmegiň mümkinçilikleri ara alnyp maslahatlaşyldy. Şu jähtden iki tarapyň hem gatnaşyklary işjeňleşdirmäge islegi beýan edildi.
Halkara sambo federasiýasynyň prezidenti Wasiliý Şestakow bilen wideo-gepleşikleriň barşynda Türkmenistanda Sambo boýunça dünýä çempionatyny geçirmegiň ugurlary ara alnyp maslahatlaşyldy. Hususan-da, çempionatyň guramaçylyk meseleleri boýunça täzelenen Şertnama babatda pikir alşyldy. Şeýle hem taraplar Federasiýanyň tehniki wekilleriniň ýaryşa taýýarlygy utgaşdyrmak üçin ýurdumyza iş saparlaryny guramaklyga ünsi çekdiler.
Mundan başga-da, türkmen türgenlerini Sambo boýunça dünýä çempionatyna taýýarlamagyň Iş meýilnamasynyň durmuşa geçirilişiniň we Halkara sambo federasiýasy bilen Başa-baş söweşler milli federasiýasynyň, şeýle hem Milli olimpiýa komitetiniň arasynda hyzmatdaşlygy giňeltmegiň geljegi ara alnyp maslahatlaşyldy.
