Iýun aýynyň 3-7-si aralygynda D. Azady adyndaky Türkmen milli dünýä dilleri institutynda Gündogaryň beýik akyldar we ajaýyp nusgawy şahyry Magtymguly Pyragynyň doglan gününiň 300 ýyllygy mynasybetli guralan hepdelik geçirildi.

Institutyň rus dili we edebiýaty fakultetiniň geçiren baý mazmunly hepdeligi “Magtymgulynyň şygryýet dünýäsi” diýlip atlandyryldy. Hepdeligiň maksatnamasy rowaýata öwrülen şahyryň durmuşyna we baý edebi mirasyna bagyşlanan dürli çäreleri, ýaryşlary, duşuşyklary öz içine aldy.

Institutda hepdeligiň açylyşy we ilkinji güni dabaraly we döredijilikli ýagdaýda geçdi. Şol gün rus dili we edebiýaty fakultetiniň talyplary uly mugallym Gozel Orazmuhammedowanyň ýolbaşçylygynda çärä gatnaşýanlara “Magtymguly Pyragy – bagtyndan jyda düşen şahyr” we “Magtymguly we Puşkin” temalarynda çykyşlaryny hödürlediler.

Talyplar şahyryň liriki goşgularyny – çuňňur mana, beýik watançylyk duýgusyna we düşünjesine ýugrulan duýguly setirlerini labyzly okadylar. Türkmen halkynyň Milli Lideri Gahryman Arkadagymyzyň “Türkmeniň döwletlilik ýörelgesi” atly kitabynyň mazmunyna girizilen beýik nusgawy şahyr Magtymguly hakda paýhasly sözleri aýratyn buýsanç duýgusy bilen ýaňlandy.

Hepdeligiň çäginde beýik şahyryň ömri we döredijiligi boýunça çykyşlar we Magtymgulynyň goşgularyny labyzly okamak boýunça bäsleşik geçirildi. Bäsleşikleriň netijeleri boýunça ýeňijiler Hormat hatlaryy bilen sylaglandylar.

Hepdeligiň soňky gününde institutda rus dili bölüminiň mugallymlary A. Sähedowanyň we G. Orazmuhammedowanyň ýolbaşçylygynda taýýarlanan “Sözleriň – bagşylaň dilinde sena” atly döredijilik duşuşygy geçirildi. Bu çäre institutyň mugallymlarynyň, döredijilik zehini berlen talyplarynyň we “Neýtralnyý Turkmenistan” gazetiniň habarçysynyň gatnaşmagynda geçirildi.

Duşuşyk ähli döwürleriň we halklaryň beýik şahyrlary Magtymguly Pyragynyň we A. S. Puşkiniň döredijiligine bagyşlandy. Türkmen halkynyň buýsanjy we rus şygyrýetiniň parlak Güneşi – ilkinji nobatda, Watana bolan hakyky, çyn söýgi bilen birleşen bu iki beýik zehini şeýle atlandyrýarlar. Sözüň hakyky ussatlary eserlerinde aýdylan zatlaryň hemmesini alawlap duran kalplaryndan geçiripdiler we tutuş döredijiligi bilen öz halklaryna hyzmat edipdirler.

Duşuşykda talyplar uly ylham bilen özleriniň ajaýyp şahyrlara, eziz we söýgüli Watanymyza – Garaşsyz, Bitarap Türkmenistana bagyşlanan goşgularyny-da okadylar.